"Мин - Габдрахманның өченче хатыны"

Уфага баргач, Башкортстанның халык, Русиянең һәм Татарстанның атказанган артисты Нәзифә апа КАДЫЙРОВА белән күрештем. Балачакта аклы-каралы телевизордан күреп сокланган бик чибәр ханым бүген дә гаҗәеп сөйкемле.

Нәзифә апаның язмышы бик гыйбрәтле. Утыз ике ел каенана белән яшәгән, ирен, бердәнбер баласын югалткан, әмма бирешмәгән. Бозда мотоузыш буенча беренче дөнья чемпионы Габдрахман Кадыйровның көчле рухлы хатыны ул!

— Габдрахман миннән унөч яшькә олы. Без танышканда, ул инде данлыклы кеше иде. Минем дә танылган чакларым. Ул мине телевизордан “Каз өмәсе” тапшыруында күреп гашыйк булган. Егерме өч яшемдә аңа кияүгә чыктым. Мин — аның өченче хатыны. Әнисенең бердәнбер улы. Шуңа күрә өйләнешүгә, барыбыз бергә яши башладык.
 
Габдрахманның спортта алган җәрәхәтләре күп иде. Уналты ел гына яшәп калдык. Баш миенә кан савып, 52 яшендә якты дөнья белән хушлашты. Ул үлгәч, каенанам Гасимәне уналты ел тәрбияләп, соңгы юлга озаттым. Шул ук елны үз әниемне, бердәнбер кызым Гүзәлне җирләдем. Пневмониядән үлгән кызымның дүрт һәм алты яшьлек ике баласы ятим калды. Алты елдан кияү дә мәңгегә күзләрен йомды. Оныкларны тәрбиягә үземә алдым. Туган авылымда да яшәп тордык. Оныклар (Данилга — 21, Лизага 19 яшь) бүген дә миндә көн итә.
 
Нишлисең, язмышыма шулай язылган. Ә мин тәкъдиргә ышанам, аннан качып булмый. Сынауларны лаеклы үтә белү мөһим. Кайгыны уйламаска, гел сөйләмәскә, бирешмәскә, көчле булырга кирәк. Хәсрәтем зур дип, беркайчан да хәмергә үрелмәдем. Аллаһы Тәгаләдән сабырлык сорадым. Күңелемне тынычландырыр өчен догалар укыдым.
 

Эльмира СӘЛАХОВА
Ирек мәйданы
Тулырак: https://matbugat.ru/news/?id=46095