Линолеум сайлаганда ниләр белеп тору хәерле?

Метражлап сатыла, идәнгә җәелә торган материал буларак, сыйфатлы линолеум кире кайтарылырга тиеш түгел, ди белгечләр. Шуңа күрә дә аны сатып алыр алдыннан, каплана торган мәйданны, рәсеме турында мәгълүматны исәпкә алып, үлчәүләрне дөрес башкару зарур.

Линолеум берничә төрле була: материалына, җитештерүчесенә карап аның бәясе дә төрләнә. 

Линолеум сатып алыр алдыннан җитештерүче тарафыннан кулланылган химик матдәләр һәм материаллар исемлегенә игътибар итәргә кирәк. Алар зарарлы булмасын. Шәхсән күргәнем дә бар: бик начар химик ис аңкып торган линолеумнарны да. Җәеп, берничә ай үткәч тә исе бетми... Игътибарлы булыгыз!

Линолеум рулон киңлеге һәм озынлыгы, калынлыгы һәм хезмәт итү вакыты белән билгеләнә. Линолеумның нинди ГОСТ яки ТУ буенча әзерләнүе турында мәгълүматны товардагы маркировкада карарга мөмкин.

Материалдагы катламның чыдамлыгы мөһим, ягъни югары катлам калынрак булган саен, линолеумның хезмәт итү вакыты озынрак була. Кухняда, коридорда яки бүлмәдә нинди линолеум урнаштырырга дигән сорау килеп туган очракта, идән катламнарының махсус Европа классификациясе бар. Ул шулай ук Русиядә дә кулланыла. Әлеге классификация нигезендә барлык биналар да өч типка бүленгән. 2нче сан белән торак бүлмәләре, 3 – офис, 4 - җитештерү биналары билгеләнә. Шулай ук йөкләнешнең дәрәҗәсен билгеләргә мөмкин: 4 - бик югары, 3 – югары, 2 – уртача, 1 - түбән. Ике саннан торган комбинация белән идән катламының классын билгелиләр. Мәсәлән, 22 - уртача,  торак өчен барачак, ә 33 - югары йөкләнешле, офис бинасына менә дигән булыр һ. б.

Линолеум сатып алган вакытта сатучыдан әлеге товар турында мәгълүматны таләп итәргә һәм укырга кирәк. Кулланучыга тулы һәм дөрес мәгълүмат алу хокукын «Кулланучылар хокукларын яклау турында» РФ Законы гарантияли.

Линолеумда җитешсезлекләрне ачыклаган очракта югарыда күрсәтелгән Законның 18 статьясына мөрәҗәгать итәргә кирәк. Бу канун акчаны кире кайтарырга яки товарны алыштырырга ярдәм итәчәк.

Юлай НИЗАЕВ әзерләде.