Уфа шифаханәсендә МХО яугирләре өчен тернәкләндерү үзәге булдырылачак

27 гектарда урнашкан һәм 700 ял итүчене урнаштыра алырлык заманча дәвалау - савыктыру комплексында 30 белгечлек буенча дәвалау-консультация ярдәме күрсәтүче 5 бүлек бар. «Зеленая роща» генераль шифаханәсе генераль директоры Фиял Байтеряков, шифаханәдә кардио - һәм нейрореабилитация узарга мөмкин, монда шулай ук ашкайнату, сулыш, сөяк-мускул һәм нерв системасы авыруларын, эндокрин система чирләрен һәм башкаларны дәвалыйлар, дип аңлатты.

Төбәк Башлыгы шифаханәнең беренче корпусын караган вакытта берничә дәвалау кабинетында, ашханәдә булды. Шифаханә базасында инвалидларны һәм махсус хәрби операция яугирләрен тернәкләндерү үзәген булдыру планнары турында фикер алышты. Моның өчен әлеге корпусны ремонтлау һәм реконструкцияләү кирәк булачак. Инвалидлар өчен уңайлы мохит булдырырга, пандуслар ясарга, ишек уемнарын киңәйтергә, заманча лифтлар урнаштырырга кирәк булачак. Шулай ук махсус медицина җиһазлары сатып алырга кирәк булачак.

Радий Хәбиров шифаханәнең беренче корпусын реконструкцияләү буенча проект-смета документациясен әзерләргә, әмма шул ук вакытта кирәкле медицина реабилитациясен уздыру өчен МХО солдатларын май аеннан ук кабул итә башларга кушты.

"Без махсус хәрби операция яугирләре өчен тернәкләндерү үзәге булдырырга телибез һәм яңасын төзүгә кадәр төрле вариантлар эзләдек. Әмма «Зеленая роща» шифаханәсенең тернәкләндерү бүлеге эшен анализлаганнан соң, биредә булган мәйданнарның һәм мөмкинлекләрнең 25 процентка файдаланылуын күрдек. Корпус ремонтны, тиешле актуаль җиһазлар сатып алуны таләп итә, әмма тулаем алганда мондый үзәк булдыру өчен күп нәрсә бар инде. Һәм бу чынлыкта идеаль идея. Аңлашыла ки, без реконструкцияне проектлый һәм үткәрә башлаганчы, вакыт узачак. Ә егетләргә хәзер үк ярдәм кирәк. План шундый: май аенда ук без бирегә реабилитациягә мохтаҗ МХО яугирләрен кабул итә башлыйбыз. Әкренләп ремонт эшләрен башлыйбыз. Уңайлы мохит булдырырга, яңа методикалар кертергә кирәк, алда зур эш тора. Әмма иң мөһиме, без идеаль чишелеш таптык", - дип билгеләп үткән Радий Фәрит улы.

"Башинформ" буенча Юлай НИЗАЕВ әзерләде.