Исерек водитель артыннан куып, ДПС хезмәткәрләре үзләре авариягә эләккән

Уфада ДАИ хезмәткәрләре исерек водитель артыннан куганда үзләре дә авариягә эләгә. Бу хәл болай була: тәрәзәләре тонировкаланган машина водителе полициядән качарга тели. Водитель хәтта светофорның “кызыл” сигналын да исәпкә алмыйча “очкан” һәм башка водительләр өчен хәвеф тудырган.

БР буенча ЭЭМның матбугат хезмәтендә сөйләүләренчә, юл-патруль хезмәте полкы законны бозып тонировкаланган “Рено Логан” автомобилен күреп кала. Водитель инспекторның туктарга боерган таләбен исәпкә алмый. Шуннан экипаж “Рено Логан”ны куа китә. ДПС хезмәткәрләре закон бозучы водительне кулга ала.

Медицина тикшерүе водительнең исерек булуын күрсәтә. Аңа карата берничә протокол төзиләр.

Әйткәндәй, исерек водительне куалау нәтиҗәсендә патруль автомобиле икенче җиңел машина белән бәрелешә. Бәхеткә, каза күрүчеләр юк.