Кияү белән кәләш лимузин йөртүчене 100 мең сум акча урлауда гаепли

Яшьләр машинаны түләүсез игъланнар сайты аша таба. Бу ап-ак төсле "Ягуар" автомобиле була. Машина йөртүче Игорь исемле. Кияү белән кәләш 7 сентябрь иртәсендә - туй көнендә "Ягуар" машинасына кунакханә бусагасында көтеп тора. Даниил һәм Екатерина бүләкләрне һәм реквизитларны машинаның багажнигына сала. Аннары яшьләр лимузинга утырып ЗАГСка китә.

Язылышканнан соң, Игорь 2,5 сәгать фотосессия узганын көтеп тора, аннары яшьләрне ресторанга илтә. Шуннан соң аның эше бетә, Игорь өенә кайтып китә. Бер сәгатьтән соң Игорьнең телефоны шалтырый. Кияү бик борчылып шалтырата, ул машинаны арендалаган вакыт эчендә акчалар югалуын әйтә. Кияү белән кәләшкә бүләк ителгән 100 мең сум һәм 100 доллар машинада була, кияү шуларның югалуын сөйли.

"Бар да тәртиптә иде. Йөреп кайттык. Бер сәгатьтән соң Даниил шалтыратты. Ул багажниктагы кыйммәтле әйберләр югалуын әйтте. Мин ни дияргә дә белмәдем, үземә дә шок булды. Миңа кирәкми ул, мин андый эшләр белән шөгыльләнмим. Ни сәбәпле миңа дәгъва белдергәннәрен дә аңламыйм. Даниил полициягә гариза язуын әйтте. Хокук саклаучылар урлаган кешегә акылга килеп, гаебен танырга вакыт бирде, ди. Без очрашырга сөйләштек, әлегә берни дә аңлашылмый", - дип сөйләгән Игорь "КП" сайтына.

Екатерина белән Даниилның туен бозган күңелсез хәлнең, бүләкләрнең серле югалуы сәбәпләре әлегә билгеле түгел, диелә хәбәрдә.