Түрәләр эшен пенсионер эшләгән

Воронежда яшәүче 79 яшьлек пенсионер Иван Морозов район дәваханәсенә ике пластик тәрәзә куйдырткан.

Бу изге гамәлнең сәбәпләре дә бар – Иван дәдәй үзе берничә тапкыр шушы дәваханәдә ятканда палатаның суыклыгына, тәрәзәдән җил өрүенә игътибар иткән. Һәм... палатага евро-тәрәзә куярга кирәклеген аңлаган.

Кирәкле сумманы җыю өчен – ә бу 50 мең сум тирәсе – пенсионер пайларын һәм мотоциклын саткан. Сәламәтлек саклау өчен урындагы чиновникларга караганда күбрәк өлеш керткән Иван дәдәйгә афәрин дими, нәрсә дисең!