Зөлфирә Шәйдуллина: "Алмазның тиз үпкәли торган гадәте бар..."

“Шәһри Казан” басмасына биргән интервьюда яшь җырчы Зөлфирә Шәйдуллина гаилә тормышы турында сөйләгән.

– Алмаз белән яшь аермагыз – 10 ел. Мөнәсәбәтләрдә сизеләме бу?

– Сизелә. Кайвакыт аны бөтенләй аңламыйм. Аларның әни белән уртак темалары күп. Дөньяга карашларыбыз аерыла. Әгәр бертөрле булсак, яшәргә кызык булмас иде...

– Димәк, концертта сөйләгән хәлләр чын?

– Әлбәттә. Без ялган әйбер сөйләмибез. Барысы да тормыштан алынган хәлләр. Беренче елны гаиләдә булган бөтен әйберне сәхнәгә чыгып сөйли иде. “Алай ярамый” дигәч, иләк аша уздыра башлады.

– Алмазның холкы җиңел түгел, диләр...

– Аның тиз үпкәли торган гадәте бар. Хәзер инде бераз басыла башлады. Минем дә холкым җиңелләрдән түгел. Кызып китәргә мөмкинменг. Элегрәк мин юл куйсам, хәзер күбрәк Алмаз юл куя. 

– Арагызда көнләшү бармы?

– Башта мин көнләшә идем, хәзер Алмаз көнләшә. Әмма алай бәйләнеп, акылдан язып көнләшми, әлбәттә. Бер-беребезгә ышанабыз. Ышану булмаса, бигрәк тә артист халкында, яшәп булмас иде. Шулай да гаилә тормышында сак булырга кирәк...