Рамил Шәрәпов 1 сентябрь алдыннан ата-ананың «ыштансыз» калуы турында видео төшергән

Юмор остасы, «Шәрапҗан» образын тудыручы Рамил Шәрәповның кызы белән малае мәктәпкә әзер. Тик балаларны киендереп, ул үзе ыштансыз, тишек носки белән калган. Артист балаларны мәктәпкә әзерләү ата-ана кесәсенә шактый «сугу»ына юмор аша ишарә ясаган.

«Менә бу – 1 сентябрьгә әзер балалар. Шатланалар, болар – бәхетле. Менә бу – аларның спонсоры. Авызыгызны сиксән-туксан. Ел саен шулай, 1 сентябрь килә икән – балалар ыштанлы, ата-аналар – ыштансыз. Саклагыз ата-аналарыгызны!» – дип, тишек майка һәм носкидан аптырап утыра «Шәрапҗан» образына кергән артист.

«Әмма балалар яңа кием һәм яңа букчаларга бик шат, тизрәк аларны киеп мәктәпкә барырга хыялланалар», «Балалар куансын өчен ата-ана тырыша инде», «Борчылма, тиздән 23 февраль, носки бүләк итәрләр», – дип комментарий калдырганнар.

Шулай ук артистның сәхнәдәш дуслары да бу видеодан рәхәтләнеп көлгән смайликлар калдырган.

Чыганак: «Интертат»