Су коену сезоны башланды...

Коткаручылар югары әзерлек режимында эшли.

БР буенча Гадәттән тыш хәлләр министрлыгы мәгълүматлары буенча, рәсми су коену сезоны башыннан 6 кеше батып үлгән. Сезон ачылыр алдыннан Чишмә районының Салих авылында Уза елгасында яшүсмер һәлак булган. Дүртөйледә тагын бер фаҗига булды: малай балык тотканда батып үлгән, дип искә төшерәләр ведомствода.

Ел башыннан республиканың су объектларында 27 кеше һәлак булган, шуларның 3се – балалар. Шулай ук 2 кешене коткарганнар.

Башкортстанның Гадәттән тыш хәлләр министрлыгында гомерне коткаручы биш кагыйдә турында искә төшерделәр:

*Бала берничә секунд  эчендә  тавыш-тынсыз сулык төбенә китәргә мөмкин. Баладан күзен дә алмаган өлкән кеше аның янында суда яисә якында булырга тиеш. Балаларны карауны үсмерләргә кушмагыз!

*Күпчелек фаҗигаләр исереклек халәтендә була. Алкоголь хәвеф тойгысын йомшарта һәм салкын суда кан тамырлары спазмын китереп чыгара.

*Тикшерелмәгән сулыкларның ярларыннан, күперләрдән яисә кыялардан суга чуммагыз. Су астында агач ботаклары, ташлар, арматура кисәкләре яки су төбенең кискен тирәнәйгән урыны булырга мөмкин.

*Кабартмалы камералар, матраслар, такталар һәм “нарукавниклар” коткару чаралар түгел. Кинәт көчәйгән җил яисә су агымы сезне мизгел эчендә тирәнгә алып китүе ихтимал.

*Бик эссе көндә дә су салкын булырга мөмкин, моның көзән җыеруга китерү  хәвефе бар. Буйлар артына йөзмәгез, суга “батырышлы”  хәвефле уеннар уйнамагыз, бер-берегезне төртеп төшермәгез.

SHOT Телеграм-каналы хәбәре буенча, җәйнең тәүге көннәреннән башлап Русия сулыкларында 37 кеше гомере өзелгән. Һәлак булганнарның яртысы – үсмерләр һәм балалар.

Уфада хәвеф-хәтәрсез ял итеп була торган рәсми пляжлар исемлеге:

Дим районында: “Красивая поляна” (Красивое күле);

Калинин районында: “Песчаный” (Караидел елгасы) һәм “Гольфстрим” пляжы (Тёплое күле);

Киров районында: “Солнечный”  (Агыйдел елгасы);

Ленин районында: “Водник”  (Агыйдел елгасы) һәм “Ак-Яр Затон” пляжы (Агыйдел елгасы);

Октябрь районында: “Берег солнца” (Караидел елгасы), “Сипайловское Сочи” (Караидел елгасы) һәм “Кашкадан” (Кашкадан күле).

Чыганак: bashinform.ru