Республикада йөрәк авырулары белән ничек көрәшәләр?

Республиканың кардиология хезмәте сәламәтлек белән шәхсиләштерелгән идарә итүгә күчте.

БР сәламәтлек саклау министрлыгы башлыгы Айрат Рәхмәтуллин дүшәмбе көнне хөкүмәтнең оператив киңәшмәсендә йөрәк-кан тамырлары чирләре белән авыручылар һәм үлем очракларының югары булуын исәпкә алып, бу авыруга каршы көрәш буенча эш нәтиҗәләре турында сөйләде.

Министр сүзләренә караганда, республика кардиоүзәгенең хирургия корпусын ачу кардиохезмәт үсешенә яңа этәргеч биргән. Агымдагы елның биш аенда башкарылган югары технологияле операцияләр саны шактый артты, шул исәптән сирәк очрый торганнары да. Шулай ук телемедицина консультацияләре һәм дистанцион ЭКГ-лар саны арта.

Моннан тыш, республикада хроник йөрәк җитешсезлеген дәвалау буенча махсуслаштырылган үзәкләр, липид үзәкләре (липид профилен коррекцияләү һәм вакытында профилактикалау өчен), шулай ук 12 антикоагулянт терапия үзәге эшли, аларда канның оешуын шәхсән исәпкә алу һәм тикшереп тору алып барыла.

Тулы булмаган дүрт ел эчендә торак пунктларны күчмә хезмәт белән колачлау сизелерлек артты. Республика кардиоүзәгенә махсуслаштырылган тикшерү һәм югары технологияле дәвалау өчен җибәрелгән пациентлар саны артты.

“Без кардиология хезмәтенең өч дәрәҗәле системасын төзедек: беренче һәм икенче дәрәҗәләрдә иртә ачыклаудан алып өченче дәрәҗәдәге катлаулы диагностик тикшеренүләргә һәм югары технологияле операцияләргә кадәр, – дип билгеләде министр. – Бу үз вакытында исәпкә куярга, диспансер күзәтүенең индивидуаль планы һәм ташламалы дарулар белән тәэмин итүнең индивидуаль планы аша күзәтү сыйфатын контрольдә тотарга мөмкинлек бирә". 

Чыганак: bashinform.ru