"Дрон операторы булачакмын"

Башкортстанда яшәүче егетләр СВОда хезмәт итәр өчен пилотсыз системалар гаскәрләрен сайлаган.

Кимран белән Артёмга БПЛА операторлары эше кызыклы. Егетләрнең берсенә – 20, икенчесенә 19 яшь. Алар СВО зонасына РФ Оборона министрлыгы белән контракт төзеп юллану карарына килгән. Егетләрнең һәрберсенең үз сәбәпләре, әмма аларны бер нәрсә берләштерә.

Туймазыда яшәүче Кимран Булуев һәм Бакалыдан Артём Абдуллин мәктәпне тәмамлагач, төрле урыннарда эшләп йөргән, колледжга укырга керергә ниятләгән, армиягә барыр өчен хәрби комиссариаттан повестка көткәннәр. Әмма ахырда хәрби комиссар чакыруын көтмичә контракт төзергә булганнар. Яшьләр уйланган-уйланган да, туганнары һәм өлкәнрәк иптәшләре белән киңәшләшкән һәм ахыргы – пилотсыз системалар гаскәрләре сафларына керү карарын кабул иткән.  Бу хакта булачак дрон операторлары гражданнарны контракт буенча хезмәткә сайлап алу пунктында сөйләгән.

Кимран үсмер чагыннан беспилотниклар белән таныш. Ул һава агымында коптерлар белән идарә итә, аппаратны ничек күтәрергә һәм утыртырга икәнлекне белә. Әлбәттә инде күп яшьтәшләре кебек компьютер уеннары уйный.

“Пилотсыз очу аппаратлары темасы миңа бик кызыклы. Сабантуйлар һәм башка массакүләм чараларда мин еш кына безнең өстә коптер безелдәвен күргәнем бар иде. Без аңа кул болгый идек, соңыннан видеоны карап, үзебезне халык арасыннан эзләве күңелле иде. Коптер пультын миңа да ышандырганнары булды. Бу бик мавыктыргыч эш, – диде Кимран. –Берничә ай элек интернетта пилотсыз системалар гаскәрләрендә хезмәт итү турындагы язмага тап булдым. Игътибарлап укыдым. Мин куркак һәм җебегән түгел,  шулай да кайсыбер моментларга аерым игътибар иттем. Иң элек шунысы мөһим, контрактны бер елга төзисең, аннары инде хезмәтне дәвам итәргәме әллә әйләнеп кайтыргамы икәнлеген хәл итәсең. БПЛА операторлары алгы сызыктан берникадәр ераклыкта эшли. Кыскасы, күп нәрсәне белдем. Ярдәм чаралары турында да укыдым. Бу хакта әти-әниемә сөйләдем һәм СВО зонасына китәргә ниятләвемне әйттем. Каршы килерләр дип уйлаган идем. Әнием: “Хәл иткәнсең икән, бар”, – диде. Әтием исә: “Сак бул, сынатма”, – диде. Шулай итеп, фатихаларын бирделәр”.

Контракт буенча сайлап алу пунктында Кимран медкомиссия, әңгәмә узды. Офицерлар аңа һәм аның булачак хезмәттәшләренә дәүләт тарафыннан хәрбиләргә һәм аларның гаиләләренә ярдәм итү, БПЛА операторларын укыту һәм хезмәт итү турында җентекләп сөйләделәр. Алар билгеләп үтүенчә, хәзер егетләрне мөһим эш көтә.

“Санаторийга бармавымны аңлыйм инде. Хәзер мин сугышчы. Безне полигоннарда укытачаклар. Мин дрон операторы эшен үзләштерә алырмын кебек. Иң мөһиме теләк бит. Яныбызда тәҗрибәле инструкторлар да булачак. Алар барына да өйрәтәчәк. Ә алган белемнәребез арытаба тыныч тормышта да кирәгәчәк. Әлегә исә бар да башлана гына. Үземә “Кудрявый” позывное алачакмын. Мине мәктәптә шулай дип йөртәләр иде. Күңелем белән тынычмын, ниндидер дулкынланулар юк, Ватаныбыз  мәнфәгатьләрен яклаячакмын”, – ди Кимран.

Артёмга да үзен яңа эшчәнлектә сынап карау кызыклы. Ул, иптәше кебек үк, яңа планнар һәм өметләр белән яна.

“Дроннар белән идарә иткәнем булмады, әлбәттә. Әмма әңгәмәләшү вакытында миңа сәләтлесең, диделәр. Ә теләгем бар минем. Арытаба ниләр булыр, күз күрер. Иң мөһиме, мин төгәл аңлыйм –  башка сугышчылар белән иңне-иңгә куеп Ватаныбызны сакларга барам. Җиңү безнеке булачак”, – диде яшь егет.

Башкортстанда яшәүче башкалар да дрон операторлары сафларын тулыландыра ала. Пилотсыз системалар гаскәрләренә җыю турындагы бөтен мәгълүмат башбат.рф контракт буенча чакыру турындагы сайтта урнаштырылган.

Шулай ук Оборона министрлыгы сыгылмалы хезмәт срокларын тәкъдим итә. Контракт бер елдан алып срокка төзелә, бу хезмәт үзенчәлеген бәяләргә мөмкинлек бирә. Сугышчы эштән китә яки яңа контракт төзи алачак.

Сугышчыларга белгечлекләрен саклап калу гарантияләнә. Илнең оборона ведомствосы белән контрактта хәрби хезмәткәрне аның ризалыгыннан башка БПЛА идарәсе белән бәйле булмаган башка белгечлеккә яки гаскәрләрнең башка төренә күчерергә ярамый дип язылган.

БПЛА өлкәсендә контрактчылар тулы социаль пакет ала. Аларга законнарда каралган барлык түләүләр, ташламалар һәм социаль гарантияләр кагыла.

Моннан тыш, студентларга махсус шартлар бар. Вуз студентлары, академик отпуск алып, контракт төзергә, ә хезмәттән соң инде янә бюджет бүлегенә кире кайтырга хокуклы.

Нәтиҗәлелек өчен өстәмә түләү каралган. Дошман максатларын уңышлы  юк итүчеләргә 50 меңнән алып 500 мең сумга кадәр акча каралган.

БПЛА бүлекчәләре сафларында хезмәт белән кызыксынучыларның барысы да 122 номерына шалтырата ала. 

Чыганак: bashinform.ru