СВО катнашучыларына һәм аларның гаиләләренә ярдәм чаралары артты

Кичә Дәүләт Думасы СВО катнашучыларына һәм аларның гаиләләренә ярдәм чараларын киңәйтүче дүрт федераль закон кабул итте. Алар арасында хәрбиләрнең штатны кыскарту вакытында эш урынын саклап калуга өстенлекле хокукы турында; Росгвардиянең яраланган хезмәткәрләре янына туганнарының бушлай барып-кайтуы турында; югары уку йортларына кергәндә СВО катнашучыларының тол хатыннарына яки тол ирләренә квоталар бирү турында һәм хәрби хәрәкәтләр инвалидлары һәм ветераннарының керемнәрен бурыч түләтүдән саклау турында.

Моннан тыш, Дәүләт Думасы рәисе Вячеслав Володин хәбәр итүенчә, беренче укылышта хәрби хәрәкәтләрдә катнашу нәтиҗәсендә инвалидлык алган хәрбиләр өчен атналык хезмәт вакытын кыскартуга һәм социаль гарантияләр һәм компенсацияләр рәсмиләштергәндә Бердәм дәүләт ЗАГС реестрыннан электрон формада мәгълүмат алу мөмкинлегенә кагылышлы ике закон чыгару башлангычы каралачак.

Шулай итеп, СВО катнашучыларына һәм аларның гаиләләренә ярдәм итү өлкәсендә 2022 елдан кабул ителгән федераль законнар саны 164кә җитте.

Моңа кадәр Вячеслав Володин искә төшерүенчә, 2022 елдан башлап СВОга һәм бүген илне, аның суверенитетын һәм киләчәген алгы сызыкта яклаучыларга ярдәм итү өчен 160 закон кабул ителгән. Яңа башлангычлар хәрбиләргә һәм хокук саклау органнары хезмәткәрләренә, шулай ук аларның гаилә әгъзаларына социаль ярдәм механизмын камилләштерүгә юнәлдерелгән.

Башкортстанда СВО катнашучыларына һәм ветераннарына, шулай ук аларның гаиләләренә ярдәм итүнең 50дән артык чарасы гамәлдә. Алар исәбенә белем алу һәм дәвалау, шулай ук фронттан өйгә кайтучы ир-атларны эшкә урнаштыру, аларны реабилитацияләү һәм социализацияләү мәсьәләләре керә. 

Чыганак: bashinform.ru