Башкортстан – “Системалы чишелеш” федераль проектында

Евразия фәнни-белем бирү үзәгенең вузара кампусы студентлары техник юнәлешләрне тәмамлаучыларга ярдәм итү буенча “Системалы чишелеш” федераль проектына эләккәннәр. Сайлап алуда илнең 15 төбәгеннән 59 алдынгы югары уку йорты студенты катнашты. Башкортстанны УДНТУның “Электроэнергетика һәм электротехника” әзерләү юнәлеше студентлары тәкъдим итә. Болар –бакалавриатның дүртенче курс студентлары Радмир Исламгалиев, Равил Саримов һәм Артем Тимофеев, шулай ук икенче ел магистранты Алинә Колсарина.

– Бөтен илдән сайлап алынган студентларның берьюлы дүртесе – Уфа вузара кампусы резиденты вәкилләре булуы һәм алар республикабыз вузларыннан бердәнбер катнашучылар булуы безнең студентларны әзерләүнең югары дәрәҗәдә булуы һәм төбәктә төзелә торган фәнни-мәгариф экосистемасының нәтиҗәлелеге турында сөйли. Проект талантлы яшьләрне икътисадның реаль секторы белән турыдан-туры тоташтыра. Индустриаль партнерлар биремнәре буенча чыгарылыш квалификация эшләре – кирәкле һөнәргә һәм ил өчен актуаль булган технологик бурычларны хәл итүгә туры юл, – дип сөйләде Башкортстанның Фән һәм югары белем бирү буенча Дәүләт комитеты рәисе Светлана Мостафина.

“Системалы чишелеш” проектын “Киләчәккә лифт” программасы кысаларында “Система” хәйрия фонды һәм “Ышанычлы смена” мәгариф проектлары фонды тормышка ашыра. Ул биш юнәлешне үз эченә ала: “Информатика, исәпләү техникасы, радиотехника һәм элемтә системалары”, “Электротехника һәм җылылык энергетикасы”, “Микроэлектроника һәм нанотехнологияләр”, “Архитектура һәм төзелеш”, "Биотехника. Химик технологияләр һәм биотехнологияләр".

Проектка нәтиҗәләр 2026 елның җәендә ясалачак. Җиңүчеләр өчен бүләк проектның партнер компанияләрендә карьера башлау мөмкинлеге булачак. Моннан тыш, иң яхшы катнашучыларны, фәнни җитәкчеләрне һәм проектта актив катнашкан мәгариф оешмаларын финанс ярдәме көтә. 

Чыганак: pravitelstvorb.ru