Уфаның вузара кампусында Кытай теле һәм мәдәнияте үзәге ачыла

Уфа вузара студентлар кампусында Кытай теле һәм мәдәнияте үзәге эшли башлаячак. Бу вакыйга Русия-Кытай мөнәсәбәтләренең динамик үсеше контекстында Башкортстан өчен аерым әһәмияткә ия.

Яңа мәйданчык Кытай теле һәм мәдәнияте белән кызыксынучы һәркем өчен җәлеп итү үзәге булачак. Үзәктә төрле яшьтәге тыңлаучылар өчен тел курслары, HSK имтиханына әзерлек, шулай ук каллиграфия, кәгазьдән кисү һәм битлекләрне бизәү буенча иҗади мастер-класслар эшли башлый. Традицияләргә һәм Кытайның хәзерге тормышына багышланган чаралар үткәрү планлаштырыла.

Уфа фән һәм технологияләр университетының  өзлексез белем бирү институты директоры Татьяна Великжанина билгеләп үткәнчә, кытай телен өйрәнү яшьләрнең һөнәри үсеше өчен зур перспективалар ача. Үзәктә университет педагоглары да, тел йөртүчеләр дә, тикшерелгән нәтиҗәле методикаларны кулланып укытачаклар.

Ляонин университеты (КХР) белән хезмәттәшлеккә аерым игътибар бирелде. Аның укытучылары белән телне тирәнтен өйрәнү өчен онлайн-дәресләр оештырылачак.

– Вузара кампуста Кытай теле һәм мәдәнияте үзәген ачу мәдәниятара диалогны үстерүдә һәм республика халкы өчен белем бирү мөмкинлекләрен киңәйтүдә мөһим адым булачак, – дип билгеләп үтте Уфа университеты ректоры Вадим Захаров. - Аның максатчан аудиториясе безнең вуз вәкилләре генә түгел, ә әлеге проблема белән кызыксынучы һәм шөгыльләнүче һәркем: мәктәп укучыларыннан һәм студентлардан алып галим-тикшеренүчеләргә һәм халыкара белгечләргә кадәр булачак.