Мәдәният берләштерә

11 мартта Башкортстан Башлыгы Радий Хәбиров видеоконференция режимында Башкорт дәүләт академия опера һәм балет театрында үткән IV “Арт-Корылтай” мәдәни форумының пленар утырышында чыгыш ясады.

Чара кунаклары арасында – Русия мәдәният министры Ольга Любимова, Федерация Советының фән, мәгариф һәм мәдәният комитеты рәисе Лилия Гомәрова, “Йөрәк чакыруы буенча” сукыр һәм начар күрүче балаларга ярдәм хәйрия фондының попечительләр советын оештыручы һәм президенты Диана Гурцкая, Русия Оборона министрлыгының Мәдәният департаменты директоры Артем Горный, шулай ук Беларусь, Кытай Халык Республикасы, Казахстан, Абхазия делегацияләре һәм Үзбәкстан.

Үзенең сәламләү сүзендә Радий Хәбиров илнең Мәдәният министрлыгына төбәк проектларына ярдәм иткәне өчен рәхмәт белдерде.

– Соңгы биш елда без мәдәният өлкәсен үстерүгә 62 миллиард сумнан артык акча җибәрдек, шул исәптән федераль бюджеттан да, – диде ул.

Төбәк җитәкчесе республикада авыл мәдәният хезмәткәрләренә грант ярдәме турында да сөйләде.

– Русия Федерациясе Президенты Федераль Җыелышка Юлламасында илдә “Земство мәдәният хезмәткәре” программасы эшләтеп җибәреләчәге турында игълан итте. Башкортстанда мондый проект 2021 елдан бирле эшли һәм без аны туктатмаячакбыз, – дип белдерде Радий Хәбиров. – Авыл мәдәният хезмәткәрләренә ярдәм итүебезне дәвам итәбез, аларның саны бездә – 10 мең.

Башкортстан Башлыгы республикада кинематография үсешенә тукталды.

– Ел саен республика Башлыгының грантлар фонды бу максатларга 50 млн сум бүлә. Моннан тыш, күптән түгел кинематографистлар белән очрашуда без тармакка өстәмә ярдәм чаралары кабул иттек, – дип билгеләп үтте Радий Фәрит улы.

Ул республика коллективларының гастроль эшчәнлеген дә югары бәяләде. Аерым алганда, Башкорт дәүләт опера һәм балет театры артистлары инде өч ел рәттән Зур театрның тарихи сәхнәсендә чыгыш ясыйлар, 2024 һәм 2025 елларга да яңа программалар әзерлиләр.

Чыгыш ахырында Башкортстан Башлыгы «Арт-Корылтай» IV мәдәни форумы кунакларын Уфаның 450 еллыгы уңаеннан 2024 елның җәендә узачак бәйрәм чараларында катнашырга чакырды.

Русия мәдәният министры Ольга Любимова үз чыгышында төбәкнең мәдәният өлкәсендәге сәясәтенең нәтиҗәлелеген югары бәяләде һәм тармакка һәрьяклап ярдәм иткәне өчен Радий Хәбировка рәхмәт белдерде. Аның әйтүенчә, Башкортстан – үзенчәлекле мәдәниятле төбәк, бездә ел саен яңа проектлар гамәлгә ашырыла һәм масштаблы мәдәни вакыйгалар үткәрелә.