Төклетура чакканнан соң инфаркт кичергән

32 яшьлек хатынны республика клиник дәваханәсенә тәненә тимгелләр чыгу, күз кабаклары шешенү һәм һава җитмәүгә зарланулар белән алып килгәннәр.

Соңрак ачыклануынча, моннан алда авыру хатынның кулын төклетура чаккан, нәтиҗәдә көчле аллергик реакция барлыкка килгән. 4 сәгать эчендә  аның хәле начарайган, күкрәгендә каты авыртулар барлыкка килгән.

"Ашыгыч ярдәм" медиклары хатын-кызны яшәү урыны буенча үзәк хастаханәгә китергән, анда белгечләр ЭКГ процедурасында үзгәрешләр ачыклаган.

Кискен коронар синдромга шик белән бәйле рәвештә район хастаханәсе табиблары Г.Г. Куватов исемендәге Республика клиник хастаханәсе кардиологлары белән элемтәгә кергән.   Белгечләр авыру хатынга коронарография үткәрү һәм бәлки,  стент кую мәсьәләсен хәл итү өчен транспортировкалау турында сөйләшкәннәр.

"Ашыгыч рәвештә хатынга операция ясалды, нәтиҗәдә операциядән соңгы чорда хатын-кызны йөрәк өлкәсендәге авыртулар борчымый башлады, хәле яхшырды. Өстәмә рәвештә аллерголог тарафыннан консультацияләр үткәрелде", –дип сөйләде республика хастаханәсенең баш табибы Морат Авзалов.

Бүгенге көндә яшь хатын терелеп чыккан инде.

Морат Авзалов сүзләренчә, әлеге очракның үзенчәлеге – инфарктны Коунис синдромы котыртуында (Коунис синдромы – авыр аллергик реакция ацетилхолин бүленүне китереп чыгарган сирәк халәт), бу коронар артерияләр спазмына сәбәп булган. Әлеге халәт йөрәкне кан белән тәэмин итүнең критик бозылуына китергән.

Югарыда язылган  очрак аллергик реакцияләре булган һәркем аллергеннар белән очрашканда игътибарлы һәм сак булырга тиеш икәнлекне искә төшерә. Өй аптечкасында антигистамин препаратларны яңарту турында онытмаска кирәклеген искәртә.

Чыганак: bashinform.ru