Роспотребнадзор талпаннар төшерелгән видеога шик белдерә

Роспотребнадзорның БР буенча идарәсендә Стәрлетамакта талпаннар төшерелгән видеога аңлатма биргәннәр.

Ведомствода хәбәр итүләренчә, мессенджерларда видео авторын сырып алган талпаннарны тасвирлаучы ролик таралган. Кадр артындагы тавыш урманнарга йөрмәскә чакыра. Видео төшерелгән урын Стәрлетамак дип күрсәтелгән.

Роспотребнадзорның төбәк идарәсендә хәбәр итүләренчә, 7 апрельгә шәһәрнең медицина оешмаларына кан эчкеч бөҗәкләр кадалу очраклары белән 13 кеше мөрәҗәгать иткән. Шул ук вакытта мөрәҗәгать итүчеләр саны күпьеллык уртача күрсәткечләр дәрәҗәсендә, дип билгеләп үттеләр ведомствода.

Гигиена һәм эпидемиология үзәге филиалы мәгълүматлары буенча, сезон башыннан энцефалит һәм боррелиозның зарарлануына 9 талпан тикшерелгән.

Видео буенча бөҗәкләр иксодлы талпаннар нәселенең дала талпаннары төренә керә дип фаразларга мөмкин, дип аңлата белгечләр. Мондый бөҗәкләр күбесенчә Русиянең Европа өлешенең көньягында, Көнбатыш Себердә, Кырымда, Кавказда (Кавказ аръягын да кертеп), урта һәм Түбән Идел буенда яши.

Шуның белән бергә, Роспотребнадзор урманга яки паркка җыенганда киемгә аерым игътибар бирү мөһим, дип искәртә. Тәннең күренеп торган урыннарын каплый торган ачык төстәге кием, баш киеме кияргә кирәк. Чәчләрегезне баш киеме астына, чалбарыгызны итек кунычына тыгыгыз.

Һәр 15-20 минут саен үзегезне һәм якыннарыгызны талпаннар кадалуга тикшерегез. Инструкция нигезендә репеллентлар кулланыгыз.

Исегезгә төшерәбез, Стәрлетамакта беренче талпан кадалуын 26 мартта теркәгәннәр.

Чыганак: bashinform.ru