Корбан чалу тәртибе турында сөйләделәр

16 июньдә ил мөселманнары изге Корбан бәйрәмен билгели. Шул уңайдан бүген, 10 июньдә, Башкортстан Хөкүмәтендә Корбан бәйрәменә әзерлек турында сүз булды. Анда тантаналы чаралар үткәргәндә ветеринария-санитария таләпләрен тәэмин итү турында фикер алыштылар.

Ветеринария буенча дәүләт комитеты рәисе Азат Җиһаншин әйтүенчә, муниципалитетларда дини оешмалар белән берлектә 60тан артык махсус мәйданчык җиһазландырылачак. Уфада мондый ике мәйданчык булачак – Төньяк автовокзал территориясендә һәм Зинино бистәсе янындагы “Караван” сәүдә үзәге янында. Аларда корбан чалу ветеринария хезмәте контроле астында узачак. Барлык белгечләр кирәкле техника һәм лаборатория җиһазлары белән тәэмин ителәчәк.  

–  Корбан чалу өчен билгеләнгән барлык терлекләр алдан ук карантин чаралары, идентификация уза һәм исәпкә куела. Хайваннарны ветеринария документлары нигезендә кабул итәләр, сую клиник тикшерүдән соң рөхсәт ителәчәк. Ә сую продуктлары ветеринария-санитария экспертизасыннан соң биреләчәк, – дип аңлатты Азат Җиһаншин. – Чаралардан соң калдыкларны утильләштерү өчен махсус контейнерларга җыячаклар.

Төбәк җитәкчесе Радий Хәбиров Башкортстан Башлыгы хакимияте җитәкчесе Максим Забелинга Корбан бәйрәмен оештыруда руханиларга ярдәм күрсәтергә кушты.

–  Безнең рухи җитәкчеләребез белән нинди ярдәм кирәклеге турында сөйләшегез, – диде ул.