3D-принтерда 12 фатирлы торак йорт бастырып чыгарганнар

Франциядә Европадагы иң зур күп фатирлы торак йорт төзелеше тәмамланган, ул тулысынча 3D-басма ярдәмендә төзелгән. Бу хакта Naked Science хәбәр итә.

Социаль торактагы 12 фатирны үз эченә алган бина  планлаштырылган 50 көн урынына 34 көндә төзелгән. Төзелеш процессын нибары өч оператор контрольдә тоткан.

Төзүчеләр мәгълүматлары буенча, цемент катнашмасы, бинаның стеналарын һәм каркасын формалаштырып, 3D-принтер ярдәмендә катламлап салынган. Шул ук вакытта тәрәзәләрне урнаштыру, инженерлык коммуникацияләрен үткәрү һәм бизәү эшләрен төзүчеләр кулдан башкарган.