Сезгә карата хөрмәтебез зур

Залда төрле буын вәкилләре, төрле яшьтә булган Ватанны саклаучылар җыелган иде. Муниципаль район хакимияте башлыгының беренче урынбасары Дамир Фәнил улы Низамов  чарада катнашучыларга котлау сүзләре белән мөрәҗәгать итте. Ул махсус хәрби операциядә катнашучылар, ветераннар, интернациональ бурычын үтәгән хәрбиләр, туган җиребез азатлыгын яклаучылар, бүген дә Кораллы Көчләр сафында хезмәт итүчеләр адресына күп кенә җылы сүзләр ишеттерде. Үзенең чыгышында ул сугышчы-интернационалистларны, хәрби хәрәкәтләрендә катнашучыларны, үз гомерләрен куркыныч астына куеп Ватанның бәйсезлеген һәм бөтенлеген саклаучы офицерларны һәм солдатларны искә алды.

 “Һәр буынның үз геройлары бар. Бүгенге көндә 350дән артык  Чакмагыш егете махсус хәрби операция зонасында батырлык өлгеләре күрсәтә. Алар бүген безнең залда да бар. Якташларыбызның күбесе хәрби бурычларны лаеклы үтәгән өчен Миңнегали Шәйморатов, «Батырлык өчен», «Хәрби казанышлар өчен» медальләре белән бүләкләнгән. Без МХОда илебез мәнфәгатьләрен яклаучы яугирләребез һәм аларның гаиләләренә ярдәм итүне дәвам итәбез. Районыбызда бу юнәлештә зур эш алып барыла. Без яугирләргә ярдәм итү өчен бөтен көчебезне һәм мөмкинлекләребезне берләштердек. Моның өчен район халкына, оешма-предприятиеләргә, якташларга, эшмәкәрләргә һәм МХО да катнашучылар өчен гуманитар ярдәм җыюда актив катнашканнары өчен төрле гаскәр ветераннарының туганнарына зур рәхмәтемне белдерәм. Бүгенге көнгә Чакмагыш районыннан 600 тоннадан артык гуманитар йөк белән 34 гуманитар ярдәм җибәрелде.

Ел саен Чекмагыш егетләре Русия Федерациясе Кораллы Көчләре сафларын тулыландыра. Яшьләргә хәрби-патриотик тәрбия бирү эшенең мөһимлеге турында аерым әйтеп үтәсем килә. Мәктәпләрдә сыйныф сәгатьләре, Батырлык дәресләре, сугыш хәрәкәтләре ветераннары, МХОда катнашучылар белән очрашулар үткәрелә. Яшь армиячеләр хәрәкәте эшли, шайморатовчылар сыйныфлары, герой парталары бар. Истәлекле урыннар, обелисклар һәм мемориаль такталар саны елдан-ел арта. Болар барысы да үсеп килүче буын илнең тарихын белсен, Русия армиясенең, солдатларның һәм офицерларның батырлыкларын истә тотсыннар өчен эшләнә. Бүген батыр уллар тәрбияләгән ата-аналарга рәхмәтемне җиткерәсем килә. Без – бер зур гаилә һәм барыбыз да геройларыбызның исән-сау кайтуларын көтәбез! Барыгызга да нык сәламәтлек, Ватанга хезмәт итүдә һәм туган районыбыз, республикабыз һәм илебезнең чәчәк атуы хакына хезмәттә уңышлар телим!” – диде Дамир Фәнил улы эчтәлекле чыгышын тәмамлап.

 Аннары ул намуслы хезмәтләре һәм Ватанны саклау эшчәнлегенә керткән зур өлешләре өчен бер төркем райондашыбызны бүләкләде.

Актив гражданлык позициясе, махсус хәрби операциядә катнашучыларга гуманитар йөк җыюда һәм илтеп җиткерүдә ярдәм иткән,   ветераннар хәрәкәтен үстерүгә зур өлеш кертүләре һәм үсеп килүче буынны патриотик тәрбияләүдә актив катнашканнары өчен  Радис Радий улы Борһанов, Илдар Әгъләм улы Гайнуллин,  Мансаф Гарраф улы Галләмов, Вадим Фәрит улы Еникеев, Илвир Флюр улы Миһранов,  Рөстәм Нәсим улы  Нәбиуллин, Алмаз Илфир улы Рамазанов,  Рөстәм Камил улы Сәлимов, Алмаз Рамил улы Бикмөхәммәтов,  Азат Шәфигулла улы Рамазанов,  Ләбиб Мәзһәр улы Гомәров Башкортстан Республикасы Чакмагыш районы хакимияте башлыгының Рәхмәте хатлары белән бүләкләнде.

Район хәрби комиссары Марсель Марс улы Рәфыйков та залда җыелучыларны котлап, илебез өчен җиңел булмаган чорда берләшкән район халкына рәхмәт сүзләре җиткерде.

Чара район мәдәният йорты хезмәткәрләре, Балалар сәнгать мәктәбе коллективларының матур чыгышлары белән үрелеп барды.