Башкортстанның “Кара акула” студентлар отряды Пулково аэропортында эшли

“Кара акула” сервис отрядының Уфа фән һәм технологияләр университеты студентлары өченче тапкыр Санкт-Петербургка хезмәт вахтасына киттеләр. Бу сезонда алар илнең иң эре транспорт төеннәренең берсе булган Пулково аэропорты базасында Русия студентлар отрядларының “Взлетная полоса” абруйлы бөтенрусия проекты кысаларында эшлиләр.

Проектка барысы да эләгә алмаган: “Кара акула” катгый конкурс сайлавы үткән. Һәм моңа аптырарлык та түгел: “Взлетная полоса”  сервис отрядлары өчен иң җаваплы мәйданчыкларның берсе санала, анда стресска чыдамлык һәм карарларны тиз кабул итә белү бәяләнә.

Быел студентлар өчен эш форматы шактый үзгәргән. Әгәр элек студент отрядлары әгъзалары башлыча кунакчыллык һәм гомум туклану  өлкәсендә җәлеп ителгән булса, хәзер аларның төп бурычы – аэропортның бердәм механизм буларак өзлексез эшләвен тәэмин итү. Студентлар берьюлы берничә юнәлештә җәлеп ителгән: катлаулы җир өсте техникасы белән  дә эшли, меңләгән пассажирлар белән дә аралаша.

Отряд мастеры Камила Гатиатуллина  үзен аеруча профессиональ дәрәҗәдә күрсәтә – ул аэропортның контакт-үзәге штатына кергән. Хәзер аның бурычларында – сәяхәтчеләргә рейслар расписаниесе һәм терминаллар эчендә навигация буенча оператив консультация бирү, анда тавыш стандарт булмаган ситуацияләрне хәл итүнең төп коралына әверелә.

Аэропортта Башкортстан студентларының әзерлек дәрәҗәсен югары бәяләделәр. Кабул итүче як вәкилләре сөйләвенчә, студентларны максималь яхшы каршылаганнар: даими хезмәткәрләр арасыннан остазлар урыннарда җайлашырга ярдәм иткәннәр, эчке процессларның үзенчәлекләре белән таныштырганнар һәм һәрьяклап ярдәм күрсәткәннәр.

Отряд әгъзалары ышанычлы тылсыз да калмаган. “Черная акула" Башкортстан студентлар отрядлары патронажы астында эшли. Штаб хезмәткәре һәм юнәлеш кураторы алар белән тәүлек буе элемтәдә торалар, теләсә нинди оештыру һәм көнкүреш мәсьәләләрен оператив хәл итәләр – хәтта өйдән мең чакрым ераклыкта да.

Смена нәтиҗәләре буенча студентлар Уфага лаеклы хезмәт хакы белән генә түгел, уникаль практик багаж белән дә кайтырга планлаштыралар. Аларның Пулковода үзләштергән төп күнекмәләр – каты цейтнот шартларында тизлек һәм нәтиҗә белән эшли белү, шулай ук транспорт логистикасының үзенчәлекле бурычларын хәл итү. Студентларның планнарында – агымдагы сезонны шелтәләрсез ябу һәм киләчәктә үз көчләрен принципиаль башка техник үзенчәлекле сервис проектларында сынап карау. 

Чыганак: "Молодежная газета". 

Данил Олешко, Софья Черепанова, Ирина Тарасюк, Владислав Барташевский фотосурәтләре.