«Бәлеш ашап симердем»

 Җырчы әйтүенчә, әнисе аңа татар милли ризыклары пешерергә өйрәткән, шуңа да ул хәзер таза гәүдәле икән. Сергей Жуков шул хакта “Мәскәү – Татарстан күпере” X форумында чыгыш ясаганда әйтте, - дип яза Интертат.

Форумны алып баручылар Сергейдан: «Әниеңнән нинди милли сыйфатлар сиңа күчте?» – дип сораган.

— Әни мине тәмле пешерергә өйрәтте. Бу – бик куркыныч нәрсә, карагыз әле менә миңа! — дип көлеп җавап биргән җырчы. — Безнең өйдә милли ризыклар — бәлеш, өчпочмак, якмыш (кыстыбыйның бер төре) – тагын әллә нәрсәләр һәрвакыт була иде. Соңгы тапкыр әни Ульяновскидагы концертыма килгәндә дә буш кул белән килмәде – үзе пешергән күчтәнәчләрен бирде. Шулай булгач, ничек инде мин яхшы формада була алыйм? – дип көлгән җырчы.
 
  Сергей Жуков 1976 елның 22 маенда Ульяновскида туган. Аның әтисе – Евгений Жуков рус милләтеннән, әнисе Лилия Хәйбуллина – татар кызы. Сергейның 6 яшькә яшьрәк энесе Михаил бар.