Алсу Фазлыевага русча хаталы язасың, дип бәйләнгәннәр

Хата белән язылган русча постын укыганнан соң, виртуаль дуслары җырчы Алсу Фазлыевага социаль челтәрләрен татар телендә алып барырга   киңәш иткәннәр. 

Җырчы бер постында үзенең шатлыгы белән бүлешә: улы Аяз Фазлыев белән аның бию буенча партнеры Җәмилә Асадуллина башкала дәрәҗәсендәге бәйгедә икенче урын яулаган. Биредә барысы да матур: Аяз белән Җәмилә дә,  алар кулындагы кубок та. Тик менә улы белән горурлануы һәм балаларның тренерларына рәхмәт сүзләрен рус телендә язып кына Алсу эшне бозып куйган. 

«Урра, 2 место! Московская уровень! Горжусь!» – дип язган ул 217 мең «подписчик»лы сәхифәсенә.

Виртуаль дуслары арасында, яшь спортчыларны тәбрикләүчеләр белән беррәттән, Алсуның рус телен начар белүенә игътибар итүчеләр дә табылган.

«Уровень – он мой. Мужкой род. Отсюда – Московский уровень. Сез бик шәп татарча сөйләшәсез. Ләкин русчасында бик күп хаталар. Татарча гына языгыз, зинһар өчен», – дигән Земфира атлы бер ханым аңа.

"Шундый грамотный һәрберсе. Прям министрлар. Кеше куанып язган инде, хата табып утыралар", – дип яклаган бер ханым Алсуны.

«Бу бит ниндидер кечкенә генә хата түгел. Бик нык күзгә ташлана. Алсуны татарлар гына укып утырмый. Кисәтү өчен язылмаган. Улы, әлбәттә, бик булдыра», – дип җавап кайтарган икенчесе бу ханымга.

Чыганак: "Интертат".