Җәвит Шакиров дүрт чиләк җиләк җыйган

Юмор остасы, җырчы Җәвит Шакиров социаль челтәрләрдә урманда җиләктә төшкән фотосын куйган һәм аның астына:

"Быел да каен җиләге программасын үтәп, планны тутырдык.

Табигать җимеше - җиләк!

Күп түгел, быел сирәк.

Нибарысы дүрт чиләк.

Җыеп интекмәс идем,

Организмга кирәк! - дип такмак та язып калдырган.

Язылучылары, мондый суык һава торышында шул кадәр күп җиләк җыя алуына шаккаткан, ә шулай да, кайберләре икеләнгән. Берсе:

"Җиләк ашыйсы килә, Җәвит абыйларга барабыз инде чәй эчәргә", - дип фото астында язу калдырган. Җәвит Шакиров җавабын шигырь юллары аша җиткергән:

"Килегез!

Җиләк белән сыйлармын.

Килмәсәгез елармын.

Улица Лесной,

Переулок - шестой,

Без гастрольдә,

Дом пока пустой!" - дип шаярткан. 

Икенче игътибарлырак бер язылучысы: "Җәвит әфәнде, былтыр да шул фотоны куйган идең бит!" дигән. Юмор остасы югалып кала торганнарданмы соң?!

"Җиләге дә былтыргы,

Җәвите дә былтыргы.

Җиләккә барган идем,

Җыялмадым - кул туңды!" - дип җавап биргән.

Дуслар, сезнең якларда җиләк бармы? Җыясызмы?