Данирга - кәҗә сөте

Билгеле булуынча, Данир Сабиров әлеге көннәрдә Себер якларында гастрольләрдә йөри. Тобольск шәһәрендә концерт вакытында бер ханым сәхнәгә менеп, Данирга авыл күчтәнәчләрен өләшкән. Бу видеоны җырчы социаль челтәрдәге битендә урнаштырган.

- Буш кул белән килгән дип уйламагыз, менә сезгә кәҗә сөте алып килдем, - ди ханым пакетыннан шешәсен чыгарып.

Данир сөтне алып: "Атаданмы, анаданмы? Ә, анадыр инде?" - дип сорап, залда утырган халыкны көлдерә.

Ханымның күчтәнәчләре моның белән генә чикләнми, җырчыга кәҗә сөтеннән эшләнгән каймак һәм эремчек бүләк итә. "Эремчек бик файдалы, кызларның сөякләре нык булсын!", - ди үзен Фәүзия Шакир кызы дип таныштырган ханым.

Яраткан җырчыңның күңелен күрү, сәхнәгә менеп, үзе белән сөйләшү өчен нәрсә генә бүләк итмәссең!