Тямаев булачак “килене” белән танышкан

Татарстанның атказанган артисты Фирдүс Тямаев Илеш райоынының Яркәй авылында концерт куйганда бер кызыклы хәл булган.

Сәхнәгә 8-9 яшьлек кыз чыгып:

– Син мине онытмадыңмы? – дип Тямаевка бүләк биргән. Җырчы, аңламыйча, кыз янына килеп:

– Искә төшер әле, – дигән.

– Мин синең концертыңда җырлаган идем, – дип җавап биргән яшь кыз һәм такмаклап:

– Агыйделдән агып бара бер солдатның шинеле,

Алла бирса, үзем булам Тямаевның килене, – дип әйткән.

Фирдүс Тямаев кызны кочаклап:

– Сеңлем, килештек, син миңа килен буласың. Белгән булсам, зур малайны алып кереп, шунда ук никахын да уздыра идек, – дип җавап биргән җырчы.

Аннан соң ул кыз биргән бүләкне караган. Сумкада каймак, эремчек, катык килеп чыккан.

– Никахны бүген генә укытыйкмы соң? – дип шаяртуын дәвам иткән Тямаев.

Тамашачылар алкышлап  көлгән.

Чыганак: Интертат