Караклар гел уяу! Ә без?

Русия Эчке эшләр министрлыгының Стәрлетамак шәһәре буенча идарәсенең дежур частена 49 яшьлек җирле кеше үзенең банк исәбеннән акча урлау гаризасы белән мөрәҗәгать иткән.

Ир-ат аңлатканча, 24 июльдә, өйдә булганда, эзләү системасы аша үзенең мобиль җайланмасына АРК-файл булган автозаправка станцияләренең урнашулары турында чит кушымтаны күчереп алган. Зарарлы программа тәэминаты урнаштырылганнан соң, җинаятьчеләр аның банк исәбенә читтән торып керү мөмкинлеген  ала һәм 49 000 сум урлый. Акчаларны Чиләбе шәһәрендәге банкоматтан алалар.

Әлеге факт буенча РФ Җинаять кодексының 158 маддәсе 3 өлешенең «г» пункты буенча банк счетыннан кылынган урлау, шулай ук электрон акчаларга карата җинаять эше кузгатылган. Маддәнең санкциясе 6 елга кадәр иректән мәхрүм итү рәвешендәге җәзаны күздә тота.

Хәзерге вакытта полиция хезмәткәрләре җинаять кылуда катнашы булган затларны ачыклауга юнәлдерелгән оператив-эзләү чаралары үткәрә.

Русия Эчке эшләр министрлыгының Стәрлетамак шәһәре буенча идарәсе гражданнарның исенә төшерә:

-кушымталарны рәсми магазиннардан гына күчереп алыгыз;

- шикле сылтамалар буенча күчмәгез һәм тикшерелмәгән сайтлардан файлларны күчермәгез;

-СМС-хәбәрләрдән раслау кодларын, банк карталарының PIN-кодларын һәм CVV-кодларын беркемгә дә хәбәр итмәгез;

- таныш булмаган затларның үтенече буенча программалар куймагыз;

- нинди генә шик булса да, картаның икенче ягында күрсәтелгән номер буенча банк белән мөстәкыйль элемтәгә керегез.

Уяу булыгыз! Мошенниклар заманча технологияләр һәм социаль инженерия ысулларын кулланып, алдау юлларын даими камилләштерә. Сезнең игътибарлы һәм сак булуыгыз акчагызны саклап калырга ярдәм итәр. Үзегезне саклагыз һәм туганнарыгызны, якыннарыгызны кисәтегез!

 

Фото: rg.ru