Аграр тармакны страховкалау кирәкме?

18-21 март көннәрендә Уфада “Экспо” күргәзмә комплексында илнең төп вакыйгаларының берсе – “АгроКомплекс” халыкара күргәзмәсе һәм Агросәнәгать форумы үтә.

Башкортстан агростраховкалауда бик яхшы нәтиҗәләр күрсәтә. Бу хакта Агросәнәгать форумында Иминиятчеләренең бердәм берләшмәсе – Агроиминиятчеләрнең милли берлеге президенты Корней Биждов әйтте.

Әйткәндәй, республикада бүгенге көнгә 440 мең гектарга якын чәчүлек мәйданнары страховкаланган.

“Страховкаланган мәйданнар буенча Башкортстан Русиянең беренче 10 төбәгенә керә, авыл хуҗалыгы малларын иминиятләштерү буенча – беренче 15 исемлегендә. Бу республика агросәнәгать комплексының яклануы ягыннан бик җитди күрсәткечләр”, – ди Биждов.

Әйтик, узган елда гына Башкортстан аграрийлары 160 миллион сум иминият түләүләре алган, аларның 140 миллион сумы – туфракның артык дымлануы сәбәпле гадәттән тыш хәл программасы буенча.

Исегездәдер, илнең кайсыбер үзәк һәм көньяк төбәкләрендә булган былтыргы кыраулар авыл хуҗалыгына сизелерлек зыян китерде.

“Шуны раслый алам: Русия аграрийлары кырау тию хәвефе буенча гына да 2,4 млрд сум страховка түләүләре алдылар. 2025 елның ике аенда иминият компанияләре авыл хуҗалыгы товарлары җитештерүчеләренә 3,3 млрд сум түләде. Болар барысы да – 2024 елгы климат вакыйгалар нәтиҗәсе. Әлбәттә, аграрий агроиминиятләштерү системасының кирәкле вакытта ярдәмгә килүен күрсә, аның авыл хуҗалыгын иминиятләштерүгә мөнәсәбәте сизелерлек үзгәрә”, – диде Биждов.