Көләсең килеп торамы?

Роберт  МИҢНУЛЛИН

             КӨЛКЕ  КӨНЕ

Бездә көн дә «Көлке көне»…

Бертуктаусыз көләрлек!

Көлеп чиргә сабышырлык,

Көлә-көлә үләрлек…

Без яшәгән җәмгыятьнең

Көлке бөтен яклары:

Көлке бездә пенсияләр,

Көлке хезмәт хаклары…

Көлке безнең депутатлар,

Һәртөрле кандидатлар,

Көлке төрле телешоулар,

Көлке төрле дебатлар…

Көлке – эфир, көлке – экран,

Көлдерәләр котырып.

Шул шутлардан, клоуннардан

Булмый качып котылып…

Көлке – җитди сүзебез дә,

Көлке – кигәнебез дә…

Полный адәм көлкесе бит

Юмор дигәнебез дә!

Юмористлар сәхнә тулы,

Юк юморлары гына.

Мин шикләнә дә башладым

Бездә юмор барына…

Безнең тормыш үзе юмор…

Көлдерүчеләр – кәттә!

Бездә көн дә «Көлке көне»…

Елыйсы килә хәтта…

1.04.2018 ел

Фото: vyksavkurse.ru