Җылылык өчен 5 ел артык түләгән

Уфада яшәүче бер ир-атка  5 елга якын җылыту өчен түләүне  артык мәйдан буенча исәпләгәннәр.

    Башкортстанның торак һәм төзелеш күзәтчелеге буенча дәүләт комитетына Уфаның Транспортная  урамындагы йортларның берсендә яшәүче ир-аттан  2018 елның октябреннән 2023 елның мартына кадәр җылыту өчен түләүне дөрес исәпләмәүләре турында мөрәҗәгать килгән. Квитанциядә мәйдан 9 квадрат метрга арттырып күрсәтелгән.

    Квитанциядә “БашРТС”  түләү исәпләгән мәйдан  59,3 кв.м тәшкил иткән, ә милек хокукына таныклыкта 50,2 кв. м мәйдан күрсәтелгән. Хәзер җылылык белән тәэмин итүче оешманың исәпләүләре  дөрес түгел дип танылган, аңа кисәтү ясалган. Ә артыгын түләгән ир-атка  яңадан исәп-хисап ясалачак.