Ирләр ни өчен уңышка җиңелрәк ирешә?

   Аларның карьерада үсү, акча табу өлкәсендә хатын кызларга караганда зуррак уңышларга ирешүләрен дәлилләгән галимнәр.

   Ирләрнең бит бала табасы да, декретта утырып, дөнья мәшәкатьләренә дә баш-аяк белән чумасы юк, дияр күпләр. Алай дисәң, бүген Көнбатышта гына түгел, безнең илдә дә күп гүзәл затлар йорт эшләренә элекке заманнардагы кебек артык зур игътибар бирмиләр бит: керне машина юа, ризык әзерләгәндә күпләр ярымфабрикат куллана һ.б.

   Ләкин... сере бар икән шул. Инглиз галимнәре сораштырулар үткәргәннән соң шуны ачыклаган: һәр бишенче кеше йокысыз төн үткәрүгә зарлана икән. Һәм шуларның 65 проценттан артыгы – хатын-кызлар. Психологлар бу хәлнең сәбәбен ачыклаганнар. Эш шунда: юрган астына кереп чумуга ук, ирләр тормыш ваклыкларын онытырга сәләтле икән. Ә хатын-кызларның исә йокларга яткач та, хәтта йоклаганда да – башлары тулы уй. Бу табигатьтән шулай бирелә һәм аны үзгәртеп булмый, имеш. Менә шул сәбәпле, алар тиешенчә ял итә алмыйлар. Һәм, әлбәттә, аларның ирләргә караганда эшләү сәләтләре дә түбәнәя,- ди галимнәр.

Фото: rg.ru