Йодрык сугышында көч сынашачаклар

Башкортстан башкаласында масштаблы спорт вакыйгасын кабул итәргә әзерләнәләр: 29 августта Көрәш сараенда республика тарихында икенче тапкыр йодрык сугышы буенча профессиональ турнир “Прайм Файтинг Чемпионшип” узачак. Ярышлар “Русия спорты” дәүләт программасы кысаларында уздырыла. 

Бу – агымдагы елда Уфада лиганың икенче зур вакыйгасы. 14 февральдә узган турнир безнең спортчы Илнар “Хантер” Ишембаев белән Суламбәк “Ал җәнлек” Шаһгириев арасындагы реванш белән истә калды. Анда хөкемдарларның бертавыштан карары белән Башкортстан көрәшчесе җиңү яулады.

Булачак турнир дүрт илдән – Русия, Үзбәкстан, Кыргызстан һәм Төркиядән спортчыларны җыячак. Башкортстаннан ун көрәшче катнашачак, алар рингка алты авырлык категориясендә чыгачак.

Кичәнең төп вакыйгасы – Илнар “Хантер” Ишембаев өчен яңа булган 84 килограммга кадәр авырлык категориясендә чемпионнар ярышы. 77 килограммга кадәр авырлыктагы элекке чемпион, Үзбәкстаннан Бобур Курбонов белән очрашып, спорт карьерасының яңа битен ачачак.

Гомумән, тамашачыларны 11 мавыктыргыч көрәш көтә. Катнашучылар арасында шулай ук танылган профессиональ боксчы һәм шәрә йодрыклардагы көрәшче Руслан Гайнетдинов чыгыш ясаячак. Ул быел Гадәттән тыш хәлләр буенча дәүләт комитетының Авария-коткару хезмәте коткаручылары сафына басты.

Турнир алдыннан, 28 августта, катнашучыларны медиа үлчәү тантанасы булачак. Чара “АРТ-Квадрат” киңлегендә узачак. Туры трансляция “VK Спорт” төркемендә булачак.