Алтын – Мисыр командасында

Уфада Уфа дәүләт нефть техник университеты базасында VI Халыкара кышкы уеннар узды. Быел традицион спорт бәйрәме катнашучыларның рекордлы саны белән генә түгел, ә сенсацион нәтиҗә белән дә аерылып торды: уеннар тарихында беренче тапкыр кабартылган чаңгыда йөгерүдә алтынны Мисыр җыелма командасы яулады.

Кояшлы көн һәм җиңелчә суык ярышлар өчен яхшы мохит тудырды. Оештыручылар мәктәп укучылары, көллият һәм югары уку йортлары студентлары, шулай ук чит ил укучыларыннан торган 30дан артык команда өчен сыйфатлы чаңгы юллары әзерләгән.

Уфа дәүләт нефть техник университеты һәм Башкорт дәүләт медицина университеты студентларының чабышлары бәйрәмнең төп бизәге булды. Күпертелгән чаңгыда команданың һәр катнашучысы, тәҗрибәле чаңгычыга эстафетаны тапшыру өчен, дистанцияне авырлык белән, ләкин күңелле үткән ярыш тамашачыларны финишка кадәр киеренкелектә тотты.

Мисыр җыелмасының җиңүе дүртенче узышның сенсациясе булды. Команда дистанцияне беренче булып үтмәде, әмма стратегик йөреш бик яхшы нәтиҗә бирде: финал этабында алар өчен “Снэма-сервис” компаниясенең әйдәп баручы инженеры Альберт Гыйльмияров йөгерде, ул алга чыгып, үз командасына алтын медаль алып килде.

“Без уеннарда адреналин өчен катнашабыз. Элек беркайчан да җиңмәдек, ләкин җиңү өчен каты көрәштек. Без спортны яратабыз һәм бары тик күбрәк булдыра алуыбызны исбатларга теләдек!” – дип хис-кичерешләре белән уртаклашты команда капитаны Сәлах Әхмәт.

Бишенче узышта БДМУдан Һиндстан җыелмасына уңыш елмайды. Капитан Йаш Джакатэ әйтүенчә, уңышның сере бик гади: “Бу безнең беренче җиңүебез түгел. Күбесенчә бу безнең укытучыбызның казанышы: ул безне кабартылган чаңгыда йөрергә өйрәтте”.

Ярышларга Кытай җыелмасы якты нокта куйды. Дүртенче урынны алып, егетләр чемпионларча шатландылар.

Бу традициянең башында торган Уфа дәүләт нефть техник университеты ректоры Олег Баулин уеннарның кыйммәтен ассызыклады: “Халыкара кышкы уеннар – спорт бәйрәме генә түгел, ә студентлар арасында милләтара дуслыкны ныгыту мөмкинлеге дә. Бу – формаль булмаган шартларда партнер компанияләр вәкилләре белән аралашу, мөнәсәбәтләрне ныгыту, хезмәттәшлекнең яңа формаларын уйлап табу мөмкинлеге. Катнашырга теләүчеләр саны ел саен арта баруына шатмын. Бу уеннарны мәктәпләр дә, көллиятләр дә, предприятиеләр дә түземсезлек белән көтә”.