Башкортстанда кыш көне 14 тау чаңгысы үзәге эшли башлаячак

Бу сезонда республикада төрле озынлыктагы һәм катлаулылык дәрәҗәсендәге 60 трассалы 14 тау чаңгысы үзәге эшләячәк, дип хәбәр итте төбәк Башлыгы Радий Хәбиров үзенең Телеграм-каналында.

Быел декабрь ае аз карлы булганлыктан, бүгенгә республикада әлегә «Абзак» һәм «Банное» гына ачылган. «Мраткино», «Куш-Тау» исә бары тик спортчыларны гына кабул итәләр. Калган үзәкләр, шул исәптән Уфаның «Олимпик-парк» һәм «Ак Йорт» — киләсе атна азагыннан да иртәрәк ачылмаячак.

Бу сезонда өч яңа трасса барлыкка киләчәк – Әлшәй, Нуриман һәм Учалы районнарында, дип вәгъдә итте республика җитәкчесе.

«Барлык канат юллары һәм күтәргечләр тиешле техник хезмәт күрсәтүне узган һәм эшкә әзер. Милекчеләр килүчеләргә уңайлыклар һәм куркынычсызлык турында кайгырттылар - бөтен җирдә медиклар, коткаручылар, инструкторлар бар», - дип язды Радий Фәрит улы.

Юлай НИЗАЕВ.

Фото: «Башинформ».