Башкортстан алдында баш иям!

Олимпиада уеннарында шорт-трек буенча бронза медаль яулаган Уфа егете Семен Елистратовны бүген Башкортстан Республикасы Башлыгы Радий Хәбиров котлады. Елистратов Пекин шәһәрендә барган уеннарда 1500 метрга ярышта финишка өченче булып килде. Җиңүне Көньяк Кореядан Тэ Хон Хван яулады, икенче урынга Канада спортчысы Стивен Дюбуа лаек булды.

Семен Елистратов “ГорОбзор.Ру” порталына интервью биргән. Ул Башкортстан халкына рәхмәт әйткән.

Пекиндагы Олимпиада – Семенның инде дүртенче Олимпиадасы. “Олимпиада – һәр спортчы өчен иң мөһим ярышлар, уеннар булып тора”, - дигән ул. Олимпиада уеннары дүрт елга бер үтә һәм аңа бертуктаусыз әерләнергә кирәк. Семен 2014 елда Сочи шәһәрендә үткән Олимпиада уеннарында эстафетада алтын, 2018 елда Пхенчхан шәһәрендә бронза медаль яулаган иде. Бүгенге бронза - аның  өченче медале.

• Мин үземнең тренерым Андрей Иванович Максимовка рәхмәтлемен, - дигән ул. – Бу ярышларга мине ул әзерләде. Яхшы нәтиҗә күрсәтә алдык. Дөресен генә әйткәндә, мин бүген бик бәхетлемен. Медалем белән иң беренче тренерым котлады, аннан командам, хатыным һәм әти-әнием шалтыратты. Якыннарым һәрвакыт беренче булып шалтыраталар. Минем бөтен якыннарым, гаиләм әлеге вакытта Уфа шәһәрендә яши. Җәйге әзерлекне мин Уфада үттем. Минем өчен җан аткан бөтен Башкортстан халкына башымны иеп рәхмәт әйтәм.
• Олимпиадада иң куркынычы нәрсә?
• Көн саен ПЦР-тест бирү һәм аның нәтиҗәсен көтү. Әгәр ул уңай килсә, спортчы ярышларга кертелми. Беребез дә тестның нинди киләчәген белми. Спортчы өчен иң куркынычы шул – ПЦР-тестның нәтиҗәсен көтеп утыру.

Чыганак: gorobzor.ru