Яшьләрне дә уздыра бу өлкәннәр!

27 августта Уфада Башкортстан Башлыгы Радий Хәбиров “Башкортстан озын гомерлелеге” республика фестиваленең йомгаклау этабында катнашты. Төбәк җитәкчесе бәйге җиңүчеләрен котлады һәм Гран-при ияләренә сертификатлар тапшырды. Фестивальнең тантаналы чарасы һәм Гала-концерты “Башкортостан” концерт залында узды.

– 2020 елда, коронавирус пандемиясенең авыр чорында без “Башкортстан озын гомерлелеге” проектын эшләгәндә, гади максаттан чыгып эш иттек. Кеше гомер буе хезмәт куя, энергиясен, сәламәтлеген дәүләткә, гаиләгә бирә. Ә аннары аның тормышында “элегант яшь” дип аталган чор башлана. Һәм кешенең ике юлы бар – әкренләп сүнәргә яки тулы канлы тормыш алып барырга, – диде Радий Хәбиров. – “Башкортстан озын гомерлелеге” – ул сезгә хөрмәт һәм мәхәббәт белән сугарылган проект. Районнар буйлап йөргәндә һәм экскурсиягә килгән ветераннарыбыз төркемен очратканда, минем күңел җырлый. Мин бу проектны, мөгаен, иң якты, игелекле эшләрнең берсе дип саныйм.

Республика җитәкчесе “көмеш яшьтәге” волонтерларның хезмәтен аерым билгеләде.

– Кешенең үзенең кирәк булуын һәм тормышны бераз яхшырта алуын аңлавы бик мөһим. Һәм, икенче яктан, бу аңа көч, сәламәтлек, тагын да алга таба яшәргә теләк бирә, – диде ул.

Әйтергә кирәк: “Башкортстан озын гомерлелеге”нең иң яхшы тәҗрибәләре республика фестивале Башкортстан Башлыгы гранты исәбенә үткәрелә.

Конкурс ике этапта узды. Беренче этапта июль башында муниципалитетлар хакимиятләре өлкән буын гражданнар белән эшләүче иҗтимагый оешмалар һәм социаль учреждениеләр арасыннан берсен сайлап алды. Сайлап алу нәтиҗәләре буенча 10 кешедән артык булмаган составта муниципаль командалар булдырылды.

Фестивальнең 16 июльдән 14 августка кадәр узган икенче этабында һәр команда видеоролик һәм визит карточкасы тәкъдим итте. Зона турларында 56 район һәм шәһәр, шул исәптән Уфаның җиде районы катнашты.

Нәтиҗәдә Благовещен, Дәүләкән, Калтасы, Стәрлебаш, Уфа, Яңавыл, Сибай һәм Уфаның Октябрь районнарыннан сигез команда Гран-при яулады.