Бу юлы Бишбүләк белән Борайга барып кайтканнар

Бу атнада «Ватанны саклаучылар» фонды филиалы һәм МХОда катнашучыларга ярдәм итү республика үзәге тарафыннан оештырылган «Ярдәм поезды» акциясе Бишбүләк һәм Борай районнарында булды. Ике көнлек консультацияләр вакытында белгечләр 800дән артык мөрәҗәгать кабул иттеләр. Сораулар нигездә ярдәм чараларына, юридик һәм медицина ярдәменә, документларны рәсмиләштерүдә ярдәм итүгә кагыла.  

"Ватанны саклаучылар" фонды филиалы җитәкчесе Гөлнур Колсарина мондый күчмә консультацияләрнең кирәклеген билгеләп үтте.

"Без республика халкы бер урында берьюлы берничә белгечтән ярдәм ала алырдай күчмә консультацияләрнең ни дәрәҗәдә кирәклеген күрәбез. Мондый формат үз ихтыяҗын күрсәтте. Хәзер без мондый акцияләр турындагы мәсьәләне башка ведомстволар белгечләре белән тикшерәбез. Психологик һәм медицина ярдәме кебек актуаль юнәлешләрне көчәйтик", – диде Гөлнур Колсарина.

Исегезгә төшерәбез, «Ярдәм поезды» акциясе узган елның октябрендә старт алды. «Ватанны саклаучылар» фонды филиалы командасы министрлык һәм ведомство белгечләре белән берлектә 14 муниципалитетка барып кайттылар, 4000нән артык мөрәҗәгать кабул иттеләр, аларның күбесе уңай хәл ителде. Акция 16 февральдә Уфада гражданнарны кабул итү белән тәмамланачак.