Мәктәпкәчә яшьтәге балаларга пособие

Түләүнең бу төре кереме бер кешегә яшәү минимумыннан азрак төшкән гаиләләргә түләнәчәк. Башкортстанда 2020 елда ул 10 434 сум тәшкил итә.

Гаризаны дәүләт хезмәтләре сайтында, күпфункцияле үзәкләрдә яки халыкны социаль яклау бүлекләрендә бирергә була. Калган документлар пакетын, гаиләнең кереме турындагы мәгълүматларны да кертеп, җаваплы учреждениеләр үзләре җыярга тиеш, дип аңлаттылар Хезмәт һәм социаль яклау министрлыгында.

Закон буенча, гаилә әгъзалары алган барлык акчалар да исәпкә алыначак: эш хакы, пособиеләр, пенсияләр һәм башка түләүләр.

Путин указы белән өч яшькәчә тәгаенләнгән пособиеләр кебек үк, түләүнең бу төре бер елга билгеләнә. Әгәр гаиләнең кереме бер елдан соң артмый икән, аны озайтырга була.

Чыннан да, пособиене 1 июльдән түли башлаячаклар, әмма кайгырмагыз – үткән ярты ел өчен дә акчасын бирәчәкләр. Моның өчен ике шартның үтәлүе зарури: беренчесе – 2020 елның 1 гыйнварына кадәр балага 3 яшь тулган булырга тиеш, икенчесе – әти-әниләр гаризаны үзвакытында, 1 июльдән бирергә тиеш. Әгәр балага өч яшь гыйнвар-июнь айлары аралыгында тулса, гаиләгә пособие баланың туган көненнән алып түләнә. Ягъни, мәсәлән, баланың туган көне апрельдә булса, пособие апрельгә, майга һәм июньгә тиеш.