Радий Хәбиров Михаил Дегтярев белән очрашты

Башкортстан Башлыгы Радий Хәбиров Русия Федерациясе спорт министры Михаил Дегтярев белән очрашты.

Мәскәүдә узган очрашуның көн тәртибендә - федераль акчалар һәм шәхси инвестицияләр җәлеп итеп, республикада спорт объектлары төзү, Бөтенрусия дәрәҗәсендәге спорт чаралары уздыру.

Михаил Дегтярев үткән елның октябрендә Уфада Русия Президенты Владимир Путин катнашлыгында узган "Русия – спорт державасы" форумын оештыруның югары дәрәҗәдә булуын, республика җитәкчелегенең физкультура һәм спортны үстерү өлкәсендәге эшен югары бәяләде.

– Без сезнең башлангычларыгызны хуплыйбыз. Кире элемтә бик мөһим. Сезгә – бөтен җирдә дә "яшел ут", – диде Русиянең спорт министры.

Радий Хәбиров Михаил Дегтяревка Башкортстанга бүленгән игътибары өчен рәхмәт белдерде. Башкортстан Башлыгы илнең Спорт министрлыгы җитәкчелегенә республиканың дәүләт бүләкләрен тапшырды.  Михаил Дегтяревка – Халыклар дуслыгы ордены, статс-секретарь–спорт министры урынбасары Александр Никитинга – Башкортстанның Мактау грамотасы тапшырылды. Михаил Дегтярев, үз чиратында, Радий Хәбировны «Физик культура һәм спорт отличнигы» мактау билгесе белән бүләкләде.