Радий Хәбиров Дәүләт Җыелышына Юллама белән мөрәҗәгать итәчәк

Башкортстан Республикасы Башлыгы 12 декабрьдә Дәүләт Җыелышына Юллама белән мөрәҗәгать итәчәк.

– Башкортстан Башлыгы 12 декабрьдә республика парламенты каршында Юллама белән чыгыш ясаячак, – дип хәбәр итте парламент рәисе Константин Толкачев. – Бу Башкортстан Республикасы Конституциясенең 87нче маддәсендә каралган барлык депутатлар корпусы өчен әһәмиятле вакыйга. Юлламада төбәк Башлыгы киләсе елга үсешнең төп юнәлешләрен билгеләячәк, республика белән идарә итүнең барлык дәрәҗәләре алдында торган актуаль мәсьәләләрне һәм беренче чираттагы бурычларны ассызыклаячак. Юлламаның төп тезислары 2025нче елда парламент эшчәнлеге өчен нигез булачак һәм закон проектларын эшләгәндә юнәлеш булып хезмәт итәчәк.

Парламент спикеры сүзләренчә, агымдагы икътисадый һәм сәяси хәлләр шартларында законнар чыгару һәм башкарма хакимият органнары тыгыз хезмәттәшлекне дәвам итә. Бу, төбәк җитәкчесе һәм хөкүмәт башлангычларын нәтиҗәле хокукый механизмнар аша гамәлгә ашыруны тәэмин итеп, тышкы мохит үзгәрешләренә оператив җавап бирергә, яңа шартларга вакытында җайлашырга, республика икътисадының һәм социаль даирәсенең тотрыклылыгын саклап калырга мөмкинлек бирә.

Башкортстан Башлыгының Юлламасы, гадәттәгечә, киң җәмәгать кызыксынуы уята. Чөнки ул, икътисадый үсеш, гражданнарның социаль иминлеге, экологик хәвефсезлек һәм мәдәни мирас мәсьәләләрен исәпкә алып, төбәк тормышының мөһим аспектларын чагылдыра.