Безнең делегациянең Беларуська сәфәре - мөнәсәбәтләрне ныгытуда мөһим адым

5 февральдән 8 февральгә кадәр Беларусь республикасында төбәк башлыгы Радий Хәбиров җитәкчелегендәге Башкортстан делегациясе эшләде. Уртак проектлар турында фикер алышынды, югары дәрәҗәдәге очрашулар узды. Уфа фән һәм технологияләр университетының Икътисад, идарә һәм бизнес институты директоры, профессор, икътисад фәннәре докторы Константин Гришин ике республика эшлекле сәфәренең  нәтиҗәләрен һәм хезмәттәшлек перспективаларын бәяләде.

- Хәзерге дөньяда төбәкләр арасындагы хезмәттәшлек икътисади үсеш һәм тотрыклылыкка ирешү өчен мөһим коралга әверелә. Башкортстан һәм Беларусь республикасы партнерлыгы уңышлы хезмәттәшлекнең ачык мисалы булып тора. Бу ике регион үз икътисадларын ныгыта һәм кешеләрнең тормыш сыйфатын яхшырта торган уртак проектларны актив гамәлгә ашыра, – дип билгеләде Константин Евгеньевич. – Күптән түгел Башкортстан делегациясенең Беларуська визиты ике яклы мөнәсәбәтләрне ныгытуда мөһим адым булды. Сәфәр барышында Радий Хәбиров сәнәгать мәйданчыкларында булды, Белоруссия президенты Александр Лукашенко һәм премьер-министр Роман Головченко белән очрашты, хезмәттәшлекнең төп юнәлешләре турында фикер алышты.

Эш сәфәренең мөһим нәтиҗәләренең берсе 2025-2027 елларга сигез юнәлеш буенча 74 пунктны үз эченә алган Яңа юл картасына кул кую булды. Бу төбәкләр арасындагы хезмәттәшлекнең озайлы сроклы һәм стратегик характерда булуын күрсәтә. Сәнәгать кооперациясен үстерүгә аерым игътибар бирелә. Мәсәлән, Минск автомобиль заводы (МАЗ) һәм Уфа трамвай-троллейбус заводының (УТТЗ) уртак предприятиесен төзү планлаштырыла, ул “Алга” махсус икътисади зонасы территориясендә урнашачак һәм ел саен 400-500 троллейбус чыгаруны тәэмин итәргә мөмкинлек бирәчәк.

Шулай ук планнарда – “Амкодор-Уфа” җитештерү-сервис үзәген ачу һәм “МАЗ” комплектлаучы детальләрдән чүп ташу машиналарын җыюны оештыру.

Авыл хуҗалыгы – хезмәттәшлекнең тагын бер мөһим өлкәсе. Белоруссиянең "Беларуськалий” компаниясе Башкортстанның авыл хуҗалыгы предприятиеләре өчен ашламалар китерүне тәкъдим итте, бу төбәкнең уңдырышлылыгын арттыру һәм агросәнәгать комплексын үстерү өчен аеруча мөһим. Әлеге проект белән җирле предприятиеләр кызыксыну белдерде инде.

Сәүдә-икътисади хезмәттәшлек тә көчәя бара. Киләчәктә – Беларусь Сәүдә йортының төзелеше. Бу икътисади элемтәләрне ныгытып кына калмыйча, Башкортстанда яшәүчеләргә сыйфатлы белорус товарлары белән танышырга да мөмкинлек бирәчәк. Мәдәни-гуманитар юнәлештә, туризмда һәм транспорт инфраструктурасында элемтәләр ныгый.

Башкортстан һәм Беларусь хезмәттәшлеге – үзара файдага һәм стратегик күзаллауга нигезләнгән нәтиҗәле партнерлык үрнәге. Яңа юл картасына кул кую һәм эре сәнәгать проектларын гамәлгә ашыру төбәкләр арасында ышанычның югары дәрәҗәдә булуын күрсәтә. Бу проектлар ике якның да икътисадын ныгытып кына калмый, яңа эш урыннары да булдыра, технологик алмашуга һәм халыкара базарда продукциянең конкурентлык сәләтен арттыруга да ярдәм итә.

Шунысын да билгеләп үтәргә кирәк, хезмәттәшлек машина төзелеше һәм авыл хуҗалыгыннан алып туризм һәм мәдәнияткә кадәр киң тармакларны колачлый. Бу тотрыклы үсеш һәм озайлы сроклы перспективалар тәэмин итә торган комплекслы алымнар турында сөйләргә мөмкинлек бирә. 

Чыганак: resbash.ru