Халыкара форумга 3 меңнән артык кеше җыелачак

26-27 ноябрьдә Уфада узган халыкара очрашу чын-чынлап масштаблы булачак. Катнашучыларның саны 3 меңнән артып китте инде.

Русия төбәкләре һәм Казахстан хезмәттәшлеге юбилей форумы делегацияләренең сан һәм сыйфат составын бәяләргә тырышканда, Русия Федерациясенең 24 субъектыннан 519 вәкил, Казахстаннан 196 кеше, 200дән артык массакүләм мәгълүмат чаралары вәкиле, B2B-сөйләшүләрдә катнашырга планлаштыручы 306 компания хәйран калдыра. Вазифаларның, мәнфәгатьләрнең һәм мөмкинлекләрнең бу кайнап торган әйләнешен ачыклау җиңел түгел, әмма гомум күзаллау алу мөмкин.

Шулай итеп, Русиянең 9 төбәгеннән аларның җитәкчеләре килер дип көтелә: Алтай крае губернаторы Виктор Томенко, Архангельск өлкәсе губернаторы Александр Цыбульский, Әстерхан өлкәсе губернаторы Игорь Бабушкин, Новосибирск өлкәсе губернаторы Андрей Травников, Омск өлкәсе губернаторы Виталий Хоценко, Ырынбур өлкәсе губернаторы Денис Паслер, Самара өлкәсе губернаторы Вячеслав Федорищев, Кабарда-Балкар республикасы башлыгы Казбек Коков һәм Башкортстаннан – Радий Хәбиров. Үзләренең катнашулары турында шулай ук РФ Федерация Советы, РФ Президенты хакимияте, федераль ведомстволар һәм оешмалар, шулай ук иҗтимагый оешмалар һәм эшлекле даирәләр вәкилләре белдерде.

Казахстан делегациясенә 196 кеше керәчәк, шул исәптән тугыз хакимият (акимат), Казахстанның Русиядәге консуллыгы һәм илчелеге һәм башка дәүләт органнары вәкилләре. Күрше дәүләттән Уфага кооперация һәм эшлекле хезмәттәшлек буенча җитди ниятләре булган 128 компания вәкилләре килүе дә мөһим.

Гомумән, B2В-сөйләшүләр блогы бик җитди һәм нигезле күренә. Башкортстаннан гына да авыр машина төзелеше һәм нефть химиясеннән алып IT-секторга һәм җиңел сәнәгатькә кадәр төрле тармакларда компетенцияләре булган 122 предприятие теркәлгән. Русиянең 10 төбәгеннән: Ростов, Чиләбе, Омск, Мәскәү, Самара, Ырынбур, Новосибирск, Волгоград өлкәләреннән, Алтай краеннан һәм Удмуртиядән тагын 56 фирма киләчәк. Барлыгы B2B блогында ким дигәндә 306 компания катнашачак.

Исегезгә төшерәбез, Казахстанның Костанай шәһәрендә узган Русия белән Казахстан арасындагы XIX төбәкара хезмәттәшлек форумы нәтиҗәләре буенча хезмәттәшлек турында биш төбәкара документ, шулай ук йөк күтәрү җайланмалары һәм азык-төлек сәнәгате продукциясе җитештерү буенча гомум суммасы якынча 7,7 млрд сумлык коммерция килешүләре имзаланды. Әгәр быел да сөйләшүләр шулай ук уңышлы узса, алар, һичшиксез, ике илнең һәм, әлбәттә, Башкортстанның икътисадлары өчен куәтле катализатор булып торачак.

–Башкортстан янә ике дәүләтнең мәдәниятен, гореф-гадәтләрен һәм эшлекле өлешен берләштерүче кунакчыл мәйданчыкка әвереләчәк. Форум программасы кысаларында Русия һәм Казахстан хезмәттәшлегенең актуаль юнәлешләре, шулай ук берничә халыкара спорт һәм мәдәни чаралар турында фикер алышу планлаштырыла. Ышанам ки, бу чара илебезнең сәяси һәм икътисади тормышында мөһим вакыйга гына түгел, ә бер-беребезне баетыр өчен дә мөһим мәйданчык булачак, — дип сөйләде БР Премьер-министрының беренче урынбасары – икътисади үсеш һәм инвестицион сәясәт министры вазифаларын башкаручы Рөстәм Моратов.

Әйткәндәй, форум сайтында Башкортстанның һәм ике илнең 200дән артык массакүләм мәгълүмат чаралары вәкилләре теркәлгән. Хәтта санап та  бетергесез күп кешеләр бар: Русия һәм Казахстан төбәкләренең эре габаритлы машина төзелеше техникасы экспозициясен тәэмин итүче сакчылар һәм машина йөртүчеләр, халык-сәнгать һөнәрләре күргәзмәсендә катнашучылар, гастрономия фестивале пешекчеләре, студент-волонтерлар һ. б.

Исегезгә төшерәбез, Русия һәм Казахстанның XX төбәкара хезмәттәшлек форумы 26-27 ноябрьдә Уфада яңа Көрәш сарае базасында узачак. Ике көн дәвамында Русия һәм Казахстан төбәкләре арасында сәүдә-икътисади хезмәттәшлек потенциалын гамәлгә ашыру, ике илнең төбәкара элемтәләрен һәм сәнәгать кооперациясе мөмкинлекләрен киңәйтү темасына фикер алышулар узачак. Шулай ук кунакларны бай мәдәни программа көтә. Юбилей форумы нәтиҗәләре буенча илләр төбәкара һәм чик буе хезмәттәшлеге программасына кул куячаклар, ул 12 төрле тармакта 140ка якын чараны үз эченә ала. 

Чыганак: russia-and-kazakhstan-forum.com