Кымызчы дигән даны бар

Марат Хөрмәт улы Абдулов – Урал аръягында билгеле кымыз җитештерүчеләрнең берсе.

– Көн саен 200-250 литр кымыз җитештерәбез, әмма эре шәһәрләргә чыгу өчен тагын да күбрәк җитештерергә кирәк. Безнең эчемлекне тәмләп карарга теләүчеләр саны көннән-көн арта бара, – ди фермер. – Эшчәнлекне башлаганда беренче этапта гаилә фермаларын үстерүгә грант ярдәм итте. Безнең хуҗалык конкурс программасында ике тапкыр – 2016 һәм 2021 елларда катнашты. Алынган грантның гомум суммасы 12 млн сумга якын булды. Дәүләт ярдәме белән мин башкорт токымлы атларның баш санын ике тапкырга арттыра алдым, кымыз цехы төзи башладым, кымыз әзерләү өчен кирәкле корылмалар, терлек азыгы әзерләү өчен техника сатып алдым.

Марат Абдулов ат үрчетү белән 1998 елда ук шөгыльләнә. 20 баштан башлый, бүген аларның саны йөздән артык, 70 баш – савым атлары. Ферма территориясендә мал азыгы әзерләү өчен кирәкле барлык техника, кымыз ясау өчен агач цех һәм хезмәткәрләргә яшәү шартлары тудырылган өйләр бар. Хуҗалыкта 6 кеше эшли: 2 сыер савучы, 3 ат караучы һәм тракторчы.

– Кымыз әзерләүдә мөһим шартларның берсе – җитештерү технологиясе. Без бу процессны җентекләп күзәтәбез һәм эчемлекне әзерләүнең традицион алымын кулланабыз, – ди фермер. – Малларның туклануына да җитди игътибар итәбез, аларга һәркөн солы ашату бик мөһим, сөт күләме шуңа бәйле.

Марат Абдулов, Урал аръягының иң өлкән кымызчысы буларак,“Башкорт аты” фестиваленә чакырылган.