Эшемнең сыйфаты - минем йөзем

Бүген авылларның киләчәге өчен үзе шунда туып-үскән, аның чишмәсенең суын тәмләп эчкән, урманында җиләген җыеп, көтүен көтеп, авылының айлы кичләренә гашыйк кешедән дә ныграк борчылучы бар микән? Юктыр. Безгә дә хас бу борчылулар. Чөнки без дә - авыл балалары.

Соңгы елларда авылларыбыз заман җилләре шаукымында зур үзгәрешләр кичерде: күмәк хуҗалыклар таркалды, авыллар картая. Шөкер, җан-фәрман тырышлыгын салып, ничек тә авылның сулышын саклап калырга тырышучылар да бар. Шулар янында булганнан соң, күңелләребез күтәрелеп,  илһамланып кайтабыз. Кушнаренко районының Иске Гомәр авылында Дамир Данил улы Зәйнуллин ике ел элек үзенең эшен башлап җибәргән.

Ул Чакмагыш районының Яңа Ихсан авылында туып-үскән. Үзенең “Газель”лары булган, йөк ташу белән шөгыльләнгән. Районнарда йөргәндә  күмер ясаучылар белән таныша һәм үзендә дә эшләп карау теләге туа. Якын-тирәләрдән бина эзли башлый, караштырып йөри торгач Иске Гомәр авылында 20 еллап буш торган тегермән бинасын тәкъдим итәләр.

Дамир Данил улы элеккеге колхозлардан калган цистерналар, мичкәләр сатып ала башлый. Эретеп ябыштыручылар аны утын ягып, күмер чыгару өчен яраклаштыра. Былтыр февраль аенда беренче күмерен ясап карыйлар.

• Беренче күмерне күргәч, азарт керде, - ди елмаеп Дамир. – Әлеге вакытта өч мичтә күмер ясыйбыз. Каен утынын Уфа фанер заводыннан китерәләр, утын ярыр өчен махсус җайланма сатып алдым. Бер сменада 5 егет эшли: утынны яралар, мичләргә тутыралар, мичне ягалар. Күмер чыкканчы тәүлек ярым яндырырга кирәк. Аннан мичне ачып, суытабыз, киптерәбез һәм капчыкларга төибез. Бер яндырганда уртача 600 тирәсе капчык күмер чыга. Елына 30-40 тонна җитештерергә була. Җәйге мизгелдә юл буендагы кафелар аның күмерен күмәртәләп сатып ала, хәтта ташып өлгертәлмиләр. Октябрьский, Дүртөйле, Уфа шәһәрләрендә үзенең клиентлары бар. “Иң мөһиме – күмер сыйфатлы булсын”, - ди Дамир Данил улы. Чөнки аның эшен, бизнесының йөзен сыйфат кына билгели.

Дамир Данил улында җәйге мизгелдә 10 лап эшче эшли. Эш тәүлек әйләнәсенә бара. Егетләргә тегермән бинасында яшәргә бүлмә дә ясап биргән, юынырга кайнар цех булдырганнар. Егетләр эш хакын вакытында ала, барсы да канәгать булуларын әйттеләр.

• Саклык чараларын күреп торабыз, бик җаваплы эш, - ди Дамир Данил улы. – Шайтан суы белән шаярырга яратканнар монда эшләми.

Әйткәндәй, Иске Гомәр авылының республика күләмендә үткән “Аек авыл” конкурсында катнашуына алар да коллективлары белән дәррәү кушылган. Үткән чараларга кулыннан килгәнчә ярдәм итеп, иганәчелек күрсәтеп тора.