Мәктәп, поликлиникалар төзү эшләре дәвам итәчәк

Проектларны дәүләт-шәхси эшкуарлык партнерлыгы кысаларында гамәлгә ашыру тәкъдим ителә. Мәсәлән, шундый партнерлыкка таянып, Уфаның "Затон-Көнчыгыш" бистәсендә яңа мәктәп төзү планлаштырыла. Уфада һәм Стәрлетамакта дәүләт заказы буенча ике мәктәп яңартылачак.
Боларга өстәп, Русия мәгариф министрлыгында Уфа, Стәрлетамак, Нефтекама һәм Уфа районында яңа мәктәпләр төзү буенча 6 проект якланган.
Сәламәтлек саклау өлкәсендә исә Уфа, Стәрлетамак, Туймазы, Бөре шәһәрләрендә, Уфа районының Зубово авылында һәм Иглин район үзәгендә - җәмгысе 7 яңа поликлиника һәм дәваханә корпуслары - өстенлекле объектлар төзү исемлегенә кертелгән.
Республика җитәкчесе Радий Хәбиров БР Төзелеш министрлыгына төзелеш материаллары базарында бәяләрне контрольдә тоту бурычын йөкләде.
"Инвестсәгать" ахырында Уфа трамвай-троллейбус заводы базасында яңа троллейбус модельләре җитештерү проекты тикшерелде. Сүз ""Горожанин" троллейбусы һәм электробусы гибриды турында барды. Яңа модельнең төп үзенчәлекләренең берсе - контакт челтәренә тоташмыйча өстәмә аккумулятор исәбенә 30 километрга кадәр автоном йөрү мөмкинлеге.
Әле яңа техника тиешле сынаулар үтә. Рөхсәт документлары әзер булгач, ул Уфа трамвай-троллейбус заводында серияле җитештерелә башланачак.