Киләчәк хезмәттәшлеккә нигез салына

Башкортстан рәсми делегациясенең Казахстанга визиты кысаларында республика башлыгы Радий Хәбиров ил җитәкчелеге белән сөйләшүләрнең башлангыч нәтиҗәләре һәм хезмәттәшлекне үстерү перспективалары турында сөйләде.

-Бүген без Казахстан Президенты Касым-Жомарт Кемелевич Токаев белән озак һәм нәтиҗәле аралаштык. Безнең Русия һәм Казахстан хезмәттәшлеге перспективалары, Башкортстан белән хезмәттәшлекне үстерү турында кызыклы һәм тирән сөйләшү булды. Казахстан Премьер-министры Әскар Мамин белән дә зур киңәшмә булды.

Беренчедән, интеграция старт алсын өчен, тиешле инфраструктура булдырырга кирәк. Иң элек Уфа-Нур-Солтан туры рейсын ачу турында сүз бара. Коронавирус пандемиясе белән бәйле чикләүләр тәмамлануга, без шунда ук авиаэлемтәне урнаштырачакбыз. Бездә моның белән шөгыльләнергә әзер булган авиакомпанияләр бар. Бу безнең хезмәттәшлекне киңәйтүгә ярдәм итәчәк.  Башкортстан халкына Нур-Солтанны карау кызык булыр дип уйлыйм. Бу уникаль, матур шәһәр, ул үсеш алуын дәвам итә.

Икенчедән, без биредә Башкортстанның Конгресс-бюросы вәкиллеген ачарга җыенабыз. Нигездә ул бизнес өчен мәгълүмат җыю ноктасы булачак. Кешеләр бирегә килергә, сөйләшергә, килешүләр төзергә мөмкин. Монда Башкортстан һәм Казахстан эшкуарларының һәм предприятиеләренең үзара хезмәттәшлеген оештыру белән шөгыльләнүгә җаваплы кеше булачак.

Өченчедән, без эшче төркем төзү турында килештек, ул беренче чорда безнең интеграцион процессларны алып барачак.

Дүртенчедән, без Башкортстан белән Казахстан арасында товар әйләнеше үсешенә китерергә тиешле гамәлләребезнең юл картасын имзалаячакбыз. Республиканың тышкы сәүдә әйләнешенең гомум күләмендә Казахстан инде өченче урынны алып тора.

Шуңа да кәефебез күтәренке. Республика икътисады һәм безнең халык файдасына хезмәттәшлек буенча конкрет планнар бар. Монда безне туганнар кебек каршы алалар- безнең уртак тарих, уртак традицияләр бар. Биредә команда җайга салынган. Киләчәк хезмәттәшлек өчен җитди нигез салабыз, дип ышанам, - диде Радий Хәбиров.

Чыганак: glavarb.ru