Кайда ни хак?

Бензин инде ул әниләр суыткычтан алып салып җибәргән каймак түгел. Аның хакы үзен ясый торган нефть хакыннан алып куела. Шулай ук бензин тирәли “һава торышын” комиссияләр, субсидияләр, эшкәртү, ташу һәм башка хисаплар китереп чыгара. Шулай итеп, түгәрәк кенә саннар килеп чыга. Литрга салып чагыштырганда каймактан арзанрак булса да, транспорт аннан бер дә маемламый, йотып кына тора, салып кына өлгерт! Безнең илнең нефть магнатлары ишетеп калмасын, бер литр ягулыкка бер литр каймак хакын куярлар, билләһи, һич кыенсынмаслар...

Алдарак иң кыйммәт бензин булган илләр турында язган идек. Бүген, киресенчә, иң арзан бензин кайда, сүз шул хакта.

1. Венесуэла

1 литр бензин 0,01$.

2.Куба

1 литр бензин 0,09 $.

Аларга арзанлы нефтьне укытучылары, табиблары, тренерлары хезмәте өчен Венесуэла "Петрокарибе” программасы буенча китерә.

3.Судан

1 литр бензин – 0,13 $.

4.Иран

1 литр бензин – 0,29$

Иран Көнчыгыштагы иң технологик үсешкән ил. Анда нефть һәм табигый газ запаслары күп.

5.Алжир

1 литр бензин – 0,35 $

Алжирның икътисады – газ һәм нефть. Алар эчке тулаем керемнең 30%, дәүләт бюджетының 60% керем өлешен, экспорттан табышның 95% тәшкил итә.

6. Кувейт

1 литр бензин – 0,34$.

Кувейт үзе белдергәнчә, анда эре нефть запаслары бар, бу якынча дөнья нефть запасының 9 проценты. Кувейт нефтьтән бик зур керем ала.

7. Нигерия

1 литр бензин – 0,40 $.

Озак еллар коррупция, сәяси тотрыксызлыктан интеккән Нигериядә хөкүмәт агросәнәгать, шәхси сектор үсешенә иркенлек бирә.

8.Төрекмәнстан

1 литр бензин – 0,43$

Табигый газ запаслары буенча дөньяда дүртенче урында, газ чыганаклары буенча икенче урында тора.

9.Казахстан

1 литр бензин – 0,46$

Дөнья икътисадында тотрыксызлык булса да, анда стабильлек саклана килде. Автомобиль йөртүчеләр бензин өчен тиеннәр генә түли. Әлеге вакытта бер литр бензин 0,48 доллар тора. 2018 елда 0,53 $ булган.

10.Мисыр

1 литр бензин – 0,43$.

Нефть - Мисырның төп продукты.Төп чыганаклары Синай ярымутравында һәм Суэцк култыгында урнашкан.

11.Оман

Әлеге вакытта бер литр бензин 0,54 $.

Оманда нефть җитәрлек. Хөкүмәт, шул сәбәпле, субсидияләрне бик юмарт финанслый. Аз керемле кешеләргә аена 200 литр ягулык бушлай бирелә!

12. Боливия

Озак вакыт инде монда бер литр бензин хакы 0,54 $тора.

Бу уңайлыклар хөкүмәтнең юмарт субсидияләренә бәйле.

13. Согуд Гарәбстаны

Кайчандыр монда дөньядагы иң арзан нефть булган.

Хөкүмәт никтер бөтен субсидияләрне бетермәкче.

Болай да, бүген аның литры 0,54 $.

14.Бахрейн

Бахрейнда 2018 елда бензин хаклары 25 процентка арткан.

Әле бер литр бензин 0,53 $.

15. Ангола

Нефть сәнәгате үсешә һәм бензин хаклары төшә бара.

Әлеге вакытта бер литр бензин 0,52 $.

16. Берләшкән Гарәп Әмирлекләре

Энергетика һәм сәнәгать министрлыклары ягулыкка хакларны төшерде һәм биредә бер литр бензинга 0,50 $ түлиләр.

17. Бирма

Монда да нефтькә хаклар төшү бензин хакы кимүгә китергән.

Әлеге вакытта 1 литр бензин уртача 0,49 доллар тора.

18. Эквадор

Бу ил хөкүмәте ягулыкны елына 3,2 миллиард доллар күләмендә субсидияли.

Әле 1 литр бензин 0,49 $ тора.

19.Әзербайҗан

АИ-80 һәм АИ-92 бензины хакы хөкүмәт тарафыннан билгеләнә. Шул сәбәпле ул хәлдән килерлек бәядә кала. Бүген бер литр бензин 0,47 $.

20.Малайзия

Эшкәртелмәгән нефтькә хаклар төшү сәбәпле, бу ил хөкүмәте дә, башка, үз гражданнары турында уйлаган ил хөкүмәтләре кебек үк, бензинның ваклап сату бәясен 12% төшереп, бер литрга 0,46 $ калдырган.

21. Катар

Биредә кара алтын хакы бөтенләй түбән – литрына 0,43 $. Шулай ук бәяләр соңгы айларда төшкән.