Юлбарыслар сугышсын, әйдә...

Петербург халыкара икътисади форумында Русия президенты Владимир Путинга Вашингтон белән Пекин арасындагы сәүдә сугышында Мәскәүнең урынына кагылышлы сорау бирделәр.

“Кытайларда яхшы мәкаль бар: акыллы маймыл үзәндә сугышкан юлбарысларның алышы ни белән тәмамланыр икән дип, читтән күзәтеп кенә утыра”, – дип шаян җавап бирде ил башлыгы.

Кытай белән АКШ арасында сәүдә сугышы былтыр җәй – ике арадагы таможня пошлиналары үз көченә кергәннән соң – башланды, ди экспертлар. Ул чатка Вашингтон Кытайдан керүче 800дән артык товар төренә 25 процент пошлина кертте. Кытай да шул рәвештә җавап бирде.

Путин әйтүенчә, “күп нәрсә үзгәрә”, төрле чикләүләр, тариф сугышлары игълан ителә – болар барысы да бар дөнья икътисадына зыян сала. “Әгәр бу чикләүләр 2022 елга кадәр бүгенге тизлектә үссә, дөньядагы сәүдә күрсәткече 17 процентка төшәчәк. Без моңа каршы”, – диде ил башлыгы.