Яман шешкә каршы вакцина әзер икән

Без Русиянең Гамалея исемендәге милли тикшеренү үзәге галимнәренең ракка каршы вакцина уйлап табуы хакында хәбәр иткән идек инде. Гадәти вакциналар, белүебезчә, чирне йоктырмас өчен алдан ясала. Әлеге вакцина исә — дәвалау өчен. Мәсәлән, аерым бер авыру кешенең яман шешеннән үрнәк алына һәм аннан ДНК/РНК үрнәкләре өйрәнелә. Ясалма интеллект шешнең генетик кодын анализлый һәм нәкъ менә шушы кешенең рак күзәнәкләрен генә таный торган махсус мРНК-вакцина төзелә.

   Дару организмга кергәч, ул иммун системасына (Т-лимфоцитларга) яман шеш күзәнәкләрен «күрсәтә» һәм аларны үтерергә боера. Чирле күзәнәкләр качып өлгерә алмый, чөнки организм аларны «дошман» буларак күрә башлый. Беренче чиратта, бу ысул иң куркыныч төрләрне — меланома (тире яман шеше) һәм үпкәнекен дәвалаганда кулланылачак.

Фото: eurocityclinic.ru