Алар безнең саулык сагында!

Башкортстан Республикасы башлыгы Радий Хәбиров, форумда катнашучыларны сәламләп, Беренчел звеноның бөтен Сәламәтлек саклау системасы өчен аеруча әһәмиятле булуын ассызыклады.

- Беренчел звено ул ышанычлы терәк, бу сәламәтлек саклау нигезе. Нәкъ менә шушы дәрәҗәдә — поликлиникаларда, амбулаторияләрдә һәм фельдшер — акушерлык пунктларында-кешенең сәламәтлеккә юллары башлана, - дип билгеләп үтте төбәк җитәкчесе.

   Аның сүзләренчә, Башкортстан өчен беренчел медицина-санитария ярдәмен камилләштерү һичшиксез өстенлекле юнәлеш булып тора. Русия Сәламәтлек саклау министрлыгы ярдәмендә республика модернизацияләүнең җитди нәтиҗәләренә ирешә алды. Төбәк Идел буе федераль округында модульле ФАПлар, табиб амбулаторияләре һәм участок хастаханәләре саны буенча беренче урында тора. Милли проектлар кысаларында учреждениеләр заманча җиһазландырыла, санитария транспорты паркы тамырдан яңартылган. «Санлы ФАП» проекты Русия Федерациясендә иң яхшысы дип танылды.

    Республикада кадрлар белән тәэмин итүгә аерым игътибар бирелә. Башкорт дәүләт медицина университеты илнең иң яхшы медицина югары уку йортлары унлыгына керә, төбәк өчен генә түгел, Федерациянең башка субъектлары өчен дә белгечләр әзерли. «Земство докторы» һәм «Земство фельдшеры» программаларын гамәлгә ашыру буенча Башкортстан Русиядә икенче һәм Идел буе федераль округында беренче урында тора.

   Башкортстанның сәламәтлек саклау министры Айрат Рәхмәтуллин чараны ачып, чарада катнашучыларны сәламләде.

   Республиканың төп казанышлары арасында ул персональләштерелгән предиктив медицинага күчүне, 430 мең баланы үз эченә алган «мәктәп медицинасы» кебек проектларны гамәлгә кертүне, ФАПларда диспансерлаштыруны (аның нәтиҗәсендә 280 мең кеше тикшерелгән) һәм предприятиеләрнең 195 мең хезмәткәрен тикшерү мөмкинлеге биргән сәнәгать диспансеризациясен атады. «Сәламәт республика — сәламәт төбәк» проекты кысаларында «Сәламәтлек поезды» акциясе үзен уңышлы күрсәтте: узган ел анда катнашучылар саны рекорд куйды һәм 175 мең кеше тәшкил итте. «Диспансеризация төне» һәм СВО катнашучылары өчен «Үзебезнекеләр өчен диспансеризация» махсус программасы кебек яңа эш форматлары югары ихтыяҗ булуын исбатлады. Сәламәтлек һәм саклауның яңа моделенең нигезе булып сәламәтлек үзәкләре тора – бүген республикада шундый 24 үзәк эшли.

Фото: resbash.ru